රන්දිකගේ සිත් සටහන්

බස් රථයේ මතකයක්

2011-09-03T11:29:00.001+05:30

නොදුටිමි ඔබේ දෑස හරිහැටි

ලැබුවේ යන්තම් ස්පර්ශය

නෙත් කොණින් බලා සැනසී

යන්නට වීමි හදිසියේම

සිත නොදුන්නද

෴

මගේ ඩිජිටල් සිතුවම් කිහිපයක්

2011-03-23T21:04:00.000+05:30

පැන්සලකින්(හෝ පෑනකින්) හා කඩදාසියකින් කරන්න පුළුවන් ගෝඩක් දේවල් තියෙනවා. මටනම් ඔය දෙකම හම්බ වුණාම කරන්නනේ හිතට එන ඕනේම දෙයක් සිතුවමට නඟන එකයි. ඉතින් දැන් මම පෙන්වන්න යන්නේ මම නිකන් ඉන්න ගමන් ඇඳපු සිතුවම් වගයක්. හැබැයි ඒවා එකක්වත් සැබෑ කඩදාසියක් මත කළ සිතුවම්නම් නෙමේ. ඒවා ඩිජිටල් මාදාලියේ නිර්මාණ. Paint.NET මෘදුකාංගය භාවිතා කරලා තමයි වැඩේ කෙ‍රුවේ. Paint.NET කියන්නේ සාමාන්‍ය Paint වලට වඩා ගොඩක් දුරට සංවර්ධනය කළ ග්‍රැෆික් මෘදුකාංගයක්. ඇත්තටම Photoshop මට්ටමටම සංවර්ධිතයි.

ඉතින් පහළ තියෙන්නේ එම මෘදුකාංගයෙන් මා කරන ලද සිතුවම් කිහිපයක්. හැබැයි ඒ කිසිවකට පරිගණක දෘෂ්‍ය ප්‍රයෝග යොදලා නෑ. තනිකර අතේ හුරුවෙන් ඇඳුණු රේඛා වලින් තමා නිර්මාණය වෙලා තියෙන්නේ.

ඉතින් ඕවා තමයි මගේ සිතුවම් ටික. සමහර වෙලාවට විකාර චිත්‍ර ටිකක් කියලා හිතෙනවත් ඇති. මේවා ගැන මොනාහරි කියන්න තියෙනවනම් ප්‍රතිචාරයක් දා‍ලම යන්න. ඔයගොල්ලොත් නිකන් ඉන්න වෙලාවට උත්සහ කරලා බලන්න. මවුසය උපරිම නිදහසේ තබාගේන හිතෙන දේ සිතුවම් කරන්න.෴

මොනවා හරි ලියලා යන්න හිතුණා

2011-03-08T18:17:00.002+05:30

ගොඩ කාලෙකට පස්සේ ඔන්න ආ‍යෙත් බ්ලොගයට මොනවාහරි ලියන්න හිතුණා. දැන්නම් ලියන්න වෙලාවක් නැති තරම්. හැමදාම ගූගල් රීඩරයට එන බ්ලොග් ලිපි ටික කියවලා ඉවර කරන්නෙත් බොහොම අමාරුවෙන්. ඉතින් මේ දවස් වල පාඩම් වැඩ තමයි කරන්නේ. ගණන් හදන එකෙත් මාරම ගතියක් තියෙනවා. ගාණක් හදලා ඒකේ උත්තරේ ගත්තම මාර සතුටක් දැනෙන්නේ. ගණිතය වැනි විෂයයක් අපිව කොච්චර දුරට හිතන්න පොළඹවනවද කියන එක දැන් මට හොදටම තේරිලයි තියෙන්නේ. තව දුරටත් ගණිතයට බය වීම අනවශ්‍ය දෙයක්.

ඉතින් ඔය අස්සේ ක්‍රිකට් තරග බලන පිස්සුවකුත් හැදිලයි තියෙන්නේ. මෙදා ක්‍රිකට් ක්‍රීඩාවේ අවිනිශ්චිතබාවය හොදින්ම පෙන්වන තත්ත්වයක් තමා ඇති වෙලා තියෙන්නේ. කොහොම වුණත් හද පතුලෙන්ම සුභ පතනවා ශ්‍රී ලංකා ක්‍රිකට් කණ්ඩායමට.

තව දෙයක් "ඉලංදාරියා" වෙනුවෙන් අපේ බ්ලොග් සඟයින් කටයුතු කරන හැටි දැක්කම ඇත්තටම සතුටක් දැනෙනවා. "මේ බ්ලොග් මාධ්‍යයෙන් අපිට කොච්චර දේවල්නම් කරන්න පුළුවන්ද?" කියලා හිතෙනවා. ඇත්තටම සිංහල බ්ලොග් අවකාශයේ මේ පියවර මම හදවතින්ම අගය කරනවා. "ඉලංදාරියා" බ්ලොග් සොයුරාටත් ඉක්මන් සුවය පතමි.

ඉතින් කොහොම හරි හිතේ තියෙන දේ පොඩ්ඩක් හරි ලියා ගත්තා සාරාංශ කරලා. එහෙනම් පසුව හමුවෙමු. (පල්ලහො තියෙන්නේ මගේ ඡායාරූපයක්. තාම මගේ පිංතූරයක් බ්ලොගයේ දාලා නැති හින්දා දාන්න හිතුණා... නිකමට වගේ...)

෴

ලබන්නාවු නත්තලට සහ අවුරුද්දට සුභ පැතුම්!

2010-12-20T22:51:00.001+05:30

මම මේ ලියන්නේ 2010 වසරේ මම ලියන අවසාන බ්ලොග් ලිපියයි. මේ ලිපිය කලින්ම ලියලා දාන්න හිතුණා. ඉතින් 2010 වසර තුළ ගොඩක් දේ සිද්ධ වුණා. විශේෂයෙන් මගේ උසස් පෙළ දිවිය පටන් ගත්තෙත් මේ අවරුද්දේ. ඒ වගේම නත්තලත් දැන් අත ළඟ. නත්තල් උත්සවය කියන එක දැන් බොහෝවිට වාණිජකරණයට වෙලා. නත්තල් සීයා වෙළඳ සංකේතයක් බවට පත් වෙලා. නගරය, වීදිය, රූපවාහිනිය හා අන්තර්ජාලය නත්තල් වෙස් අරගෙන. නත්තල ළඟ ‍එනවා කියලා හැමෝම කෑගහනවා. මේ විදයට සමරන නත්තල 18වන ශතවර්ෂයේ ඉඳලා ක්‍රමයෙන් වර්ධනය වූ උත්සවයක් කියලා කියන්න පුළුවන්. අද වාණිජකරණය සැබෑ ක්‍රිස්තු උප්පත්තියකට අභියෝග කරනවා. මිනිස්සුන්ගේ අධ්‍යාත්මය පිළිබඳව අවධානය අඩු වෙලා. විශේෂයෙන් කතෝලිකයෝ හැටියට මීට වඩා අධ්‍යාත්මික වර්ධනයක් ගැන හිතන්න ඕනේ. අනෙක් අතට ක්‍රිස්තියානි නොවන අය පවා අද නත්තල් සමරනවා. ඒක සමහර විට අර්ථශුන්‍ය දෙයක් වෙන්න පුළුවන්. මොකද ඔවුන්ට නත්තල ගැන අධ්‍යාත්මිකව ගැඹුරු අවබෝධයක් නොලැබෙන හින්දා. හැබැයි ඒගොල්ලොත් කැමැත්තක් දක්වනවා නත්තලේ උත්සව සිරිය අත් දකින්න. කොහොම වුණත් මට කියන්න තියෙන්නේ නත්තල කියන්නේ සැබෑ අධ්‍යාත්මික වෙනසකට මුල පුරන සමයක්. ඒක නිසා වාණිජකරණයට හසු නොවී ඉන්න වගා බලාගන්න ඕනේ. කොහොම හරි ළඟ එන නත්තලට මගෙන් සුභ පැතුම්. සාමයේ අරුණලු උදාවන සැබෑ අධ්‍යාත්මික වෙනසකට මුල පුරන සුභ නත්තතලක් වේවා!

නත්තලත් ඉවර වුණා කියමුකෝ ඉතින් ඊට පස්සේ අලුත් වසරක්! කාලය කියන දේ සාපේක්ෂයි කියන එක හරි. මට සාපේක්ෂවනම් දැන් කාලය ගලා යාම වේගවත් වෙලා. අනිත් අයටත් එහෙමද දන්නේ නෑ. කොහොමත් හෙට දවසට අදම සූදානම් වෙන එක තමා සුදුසුම දේ. ලබන්නාවූ නව වසර සඳහාත් මගෙන් සුභ පැතුම්! එහෙනම් ලබන වසරේදී හමුවෙමු. ස්තූතියි෴

ලංකාවේ DNS අවුල

2010-12-14T11:56:00.007+05:30

මම මේ ගැන දාන්න හිටියේ මාස දෙකකට විතර ඉස්සෙල්ලා. නමුත් කාර්යබහුලත්වය නිසා මේ ලිපිය ලියන්න අතපසු වුණා. මට මේ ගැටලුවට මුහුණ දෙන්න වුණේ Vidyawa.com නිසයි. දැන්නම් ගැටලුව කොහොම හරි විසඳිලා තියෙන්නේ. මේකයි ගැටලුව වුණේ. SLT ADSL සහ Mobitel Broadband වලින් අන්තර්ජාලයට එන පිරිසට vidyawa.com අඩවිය නොපෙනීම. මගෙ අන්තර්ජාල සම්බන්ධතාවයත් Mobitel Broadbandම තමා. මම යන්තම් ප්‍රොක්සි සර්වර් ගැන දැනගෙනන හිටිය හින්දා පොක්සි අඩවි කිහිපයකට ගිහිල්ලා ඒ ඔස්සේ vidyawa.com වෙත පිවිසුණා. එතකොට වෙබ් අඩවිය හොඳට වැඩ කළා. ඉතින් මේක මට ලොකු ප්‍රශ්නයක් වුණා.

පළමු දිනයේදී

කලින් මම හිතාගෙන හිටියේ Blogspot වලට කස්ටම් ඩොමේන් දාද්දි විතරයි මේ ලෙඩේ එන්නේ කියලා. බලගෙන යන්නකොට Wordpress Self-Hosted වලටත් ලෙඩේ ඇවිල්ලා. බැරිම තැන මම මේ ගැන කෙලින්ම Web Hosting ආයතනයෙන් ඇහුවා. ඒගොල්ලෝ කිව්වා. මේක ඒගොල්ලන්ගේ අවුලක් නෙමේ කියලා. අන්තිමේදී මේක මට ලොකු ප්‍රශ්නයක් වුණා. මොකද වෙබ් අඩවිය යාවත්කාලීන කරගන්නවත් විදියක් නෑ. ප්‍රොක්සි අඩවියක් හරහා ලොග් වුණත් ඒක එච්චර සුදුසු දෙයක් නෙමේ. අන්තිමේදී ආයේ පාරක් Web Hosting ආයතනයට කතා කරලා ඇහුවා මොනාද කරන්න ඕනේ කියලා. එතකොට කිව්වා මේක SLT සහ Mobitel දෙගොල්ලන්ගේ DNS අවුලක් කියලා. ඍජුවම ඔවුන්ගේ පරිභෝගික සේවාව අමතලා මේ ගැන කතා කරලා විසඳගන්න කිව්වා.

පළමූ දිනයට දින දෙක තුනකට පසු

ඔන්න ඉතින් මම මුලින්ම SLT පාරිභෝගික සේවාව ඇමතුවා. මට නම් ඔවුන්ගෙන් මේකට ඉක්මන් විසඳුමක් ලැබෙයි කියලා හිතුවෙම නෑ. ඉතින් කතා කරලා බොහොම අමාරුවෙන් මගේ ප්‍රශ්නය පැහැදිලා කරලා දුන්නා. වැඩි වෙලාවක් ගියේ නෑ මට SLT Data Centerහි දුරකථන අංකයක් දීලා කිව්වා මේකට කතා කරන්න කියලා. ඊට පස්සේ ඒ දුරකථන අංකයට කතා කරලා ආයේ පාරක් කිව්වා විස්තරේ. මෙන්න එකපාරටම කිව්වා අපිට DNS සම්බන්ධව කිසිවක් කරන්න බෑ කියලා. DNS ප්‍රශ්න පිළිබඳව කතා කරගන්න කියලා තවත් දුරකථන අංකයක් ලබා දුන්නා. ඊට පස්සේ ඒකටත් කතා කරලා කිව්වා විස්තරේ. පස්සේ මගෙන් ඇහුවා SLT ADSLද තියෙන්නේ කියලා. මම කිව්වා මගේ මොබිටෙල් තියෙන්නේ කියලා. එහෙනම් SLT ADSL තියෙන කෙනෙක්ට 0112021653 යන දුරකථන අංකය දීලා එයා ලව්වා පැමිණිලි කරවන්නත් කිව්වා. මම ඉතින් ඒ වෙලාවේ මගේ GTalk එකේ ඔන්ලයින් හිටිය දෙනේනෙක්ට කියලා අර දුරකථන අංකයටම පැමිණිලි කෙරෙව්වා. ඒ දෙන්නටම vidyawa.com කියලා වෙබ් අඩවියක් නෑ කියල මඟ හරවලා.මටත් දැන් මාර අප්සට්.

මේපාර මමම කතා කරලා කොහොම හරි විසඳගන්නවා කියලා SLT DNS අංශයට කතා කළා. කිව්වා විස්තරේ. මෙන්න එකපාරටම කිව්වා vidyawa.com කියලා ඩොමේන් නාමයක් නෑ කියලා. එතකොට මම කිව්වා ප්‍රොක්සි අඩවියකින් ගිහිල්ලා බලන්න කියලා. ඒ කිව්වට අහන්නේ නෑ. මට කියනවා ඒගොල්ලන්ට vidyawa.com කියලා වෙබ් අඩවියක් වැඩ නෑ කියලා. ඉතින් කතාව ඇත්ත. SLT ADSL අයට පෙන්නේ නෑ තමයි. පස්සේ මට ඒ කතා කරපු එක්කෙනාගේ ඉ-මේලි ලිපිනය දීලා කිව්වා. vidyawa.com පෙන්වන ප්‍රොක්සි වෙබ් අඩවියේ ලිපිනය මේල් කරන්න කියලා. ඉතින් මම ඔක්කොම විස්තර ටික මේල් කළා. (මේ වෙද්දිත් නොකඩවා විනාඩි 10ක් පමණ දුරකථනය ඔස්සේ සම්බන්ධ වෙලා හිටියේ) පස්සේ එයා කිව්වා "මල්ලී පොඩි අවුලක්. ඉන්න ටිකක්". ඉතින් හිටිය තව විනාඩි 4ක් විතර. ඔන්න එකපාරටම කිව්වා "දැන් vidyawa.com වැඩ" කියලා. ඇති යාන්තම් ලෙඩේ හදලා. ඉතින් මමත් තව කතා කරන්න ගියේ නෑ. ස්තූතියි කියලා තිබ්බා.

ඉතින් ඊට පස්සේ දන්න SLT ADSL තියෙන එක්කෙනෙක්ට කිව්වා vidyawa.com වැඩඩ කියලා බලන්න කියලා. කිව්වා වැඩ කියලා.දැන් හිතට පොඩි සහනයක් ආවා..

ඔන්න දැන් දෙවැනි මෙහෙයුමත් පටන් ගත්තා. මොබිටෙල් බ්‍රෝඩ්බෑන්ඩ් DNS අවුලත් SLT වගේ විසඳගන්න පුළුවන් වෙයි කියලා ඒ වෙනකොට මට විශ්වාසයක් ගොඩනැගිලායි තිබ්බේ. තව දෙයක් මොබිටල් බ්‍රෝඩ්බෑන්ඩ්වල vidyawa.com පෙන්නුවේ නැති උනාට Mදbitel GPRS වල වැඩ. ඒවගේම දවසේ එක වෙලාවකට(පැය දෙක තුනක් විතර) vidyawa.com දකින්න පුළුවන්. අනිත් වෙලාවට වෙබ් බ්‍රවුසරයේ Error Loading.... තමයි. අනේ මන්දා!

ඉතින් ඔන්න මොබිටෙල් පාරිභෝගික සේවාව ඇමතුවා. ඔන්න මුලින්ම ඇඩ් එකක් කියවනවා හෙන වෙලාවක්. ඊට පස්සේ පාරිභෝගික සේවා නිළධාරියෙක් සමඟ කතා තිරීමට මොකක්ද අංකයක් ඔබන්න කිව්වා. ඒක ඔබලා නැවත හෙන වෙලාවක් බලන් හිටියා. පසුබිමින් මිහිරි සංගීත වාදනයක් යනවා. ඒ එක්කම කියනවා. "පාරිභෝගක සේවා නිළධාරියෙක් හා සම්බන්ධ වීමට ඔබව පෙළ ගැසෙමින්'..." තියෙනවා කියලා. මං හිතන්නේ මම විනාඩි 5කට වඩා හිටියා. ඒත් ප්‍රතිචාරයක් නෑ. බැරිම තැන තිබ්බා. දෙවැනි පාරත් ගත්තා. ඒ පාර නම් එක්කෙනෙක් එක්ක කතා කරන්න හම්බ වුණා. ඒත් විනාඩි කිහිපයක් නාස්ති කරන්න වුණා. කිව්වා විස්තරේ, මට තේරුණ විදියට මම අහපු ප්‍රශ්නය මින් පෙර ඒ කෙනොගෙන අහලා නෑ වගේ. එයා කියනවා. අන්තර්ජාලය සමඟ සම්බන්ධ වීමට පුළුවන්නම් එතැනින් එහා දෙයක් කරන්න බැඳිලා නෑලු. වෙබ් අඩවි නොපෙනීම සම්බන්ධව ඒගොල්ලන්ට මොනවත් කරන්න බැරිලු. ඉතින් ඊට පස්සේ මම කිව්වා මේ ලෙඩේ SLT අයටත් තිබ්බා. හැබැයි මම ඒගොල්ලන්ට කියලා හදාගත්තා කිව්වා. ඒ වගේ කතා කරලා විසඳගන්න මොබිටෙල් තුලත් වෙනම දුරකථන අංකයක් තියෙනවද කියලා ඇහුවා. එතකොට එහෙම මොනවත් කරන්න බෑ. ඕනේනම් Mobitel General Hotline(0112330550) එකට කතා කරලා බලන්න කිව්වා.

ඉතින් ඔන්න ඒකටත් කතා කළා. හැබැයි ඒකේදී අනෙක් අංකයේ වගේ ඇඩ් කියවෙව්වේ නෑ. කෙලින්ම පාරිභෝගික සේවා නිළධාරියෙක් සම්බන්ධ කරගන්න පුළුවන් වූණා. ආයේ පාරක් ප්‍රශ්නය යොමු කළා. මේ වගේ තාක්ෂණික ප්‍රශ්න කතා කරගන්න පුළුවන් සතියේ දිනවල උදේ 8.00ත් සවස 5.00ත් අතර කාලය තුළ පමණයි කිව්වා. ඒ වෙනකොට වෙලාව සවස 6.00ත් පහු වෙලා. ඉතින් මම හෙට කතා කරන්නම් කියලා දුරකථනය තිබ්බා.

පළමු දිනයට දින හතරකට පසුව

ඔන්න පහුවදා සවස 3.00ට විතර කතා කළා Mobitel General Hotline එකට. කිව්වා මෙන්න මෙහෙමයි මම කලින් කතා කළා. මේ වෙලාවට කතා කරොත් ප්‍රශ්නය විසඳාගන්න පුළුවන් වෙයි කියලා. ඉතින් මම ප්‍රශ්නය යොමු කළා. ඔන්න එක පාරටම කියනවා. එහෙම වෙනම තාක්ෂණික අංශයකට යොමු කරන්න බෑ. පුළුවන්නම් ළඟ තියෙන මොබිටෙල් පාරිභෝගික සේවා මධ්‍යස්ථානයකට ගිහිල්ලා කියන්න කියලා.

පළමු දිනයට සතියකට පමණ පසු

ඔන්න මම මීගමුවේ පංති යන වෙලාවක මොබිටෙල් මධ්‍යස්ථානයට ගිහිල්ලා කිව්වා විස්තරේ. මාව යොමු කරෙත් මොබිටෙල් පාරිභෝගික සේවාවෙන් කියලා කිව්වා. එතකොට එතනින් එහෙම දේවල්නම් මෙතැනින් කරගන්න බෑ. කරගන්න තියෙන එකම තැන එක්කෝ කොළඹ යන්න වෙනවා නැත්නම් Mobitel General Hotline එකෙන් විසඳගන්න වෙනවා. කියලා. හැබැයි එතන ඒ වගේ ප්‍රශ්න ගැන කතා කරන එක්කෙනත් ඇවිල්ලා හිටියෙත් නෑ. කොහොම හරි ඒ වැඩෙත් හරි ගියේ නෑ.

ඊට පස්සේ ආයේ පාරිභෝගික සේවාව ඇමතුවා. කිව්වා විස්තර ඔක්කොම මුල සිට අගට. එ‍තකොට පැමිණිල්ලක් දාන්නම් කියලා මගේ දුරකථන අංකයත් ඉල්ල ගත්තා. එතකොට මගේ දුරකථනයට කොටි පණිවුඩයක් ආවා පැමිණිලි අංකයකුත් එක්ක. ලෙඩේ හැදුවට පස්සේ මොබිටෙල් එකෙන්ම කෝල් කරන්නම් කිව්වා. ඒ පාර වැඩේ හරි කියලා සති දෙක තුනක් බලං හිටියා.

පළමු දිනයට සති දෙකකට පසුව.

ඔන්න දවසක් දවල් එක පාරටම කෝල් එකක් ආවා. බැලින්නම් මොබිටෙල් එකෙන්. කිව්වා vidyawa.com අවුල විසඳුවා කියලා. ආයේ ප්‍රශ්නයක් වුණොත් කතා කරන්න කියලත් කිව්වා. ඉතින් දුරකථනය තියලා සතුටු සිතින් vidyawa.com කියලා ගහලා බැලුවා. කෝ වැඩ නෑ. ආයේ දේතුන් සැරයක් බැලුවා ඒත් වැඩ නෑ. පස්සේ දන්න මොබිටෙල් භාවිතාකරුවන් දෙතුන්දෙනෙක් ලව්වා බැලුවා ඒත් වැඩ නෑ. ඔන්න ආයේ පාරක් කතා කරලා කිව්වා විස්තරේ මුල සිට අගට. පැමිණිල්ල අලුත් කරන්නම් කියලා මගේ දුරකථනයට තව කෙටි පණිවුඩයක් ආවා නව පැමිණිලි අංකයකුත් එක්ක. දැන් ඉතිං ආයේ පාරක් කෝල් එකක් දෙනකම් බලන් ඉන්න වෙනවා.

ඉතින් ඔය විදියට මාසයක් පුරාවට වගේම vidyawa.com හි වැඩ කටයුතු අඩපණ වෙලා තිබුණා. අනෙක් හැමෝටම පෙනුණත් මොබිටෙල් බ්‍රෝඩ්බෑන්ඩ් තිබිච්ච මට vidyawa.com පෙනුණේ නෑ. ඉතින් ඔය අතරේ Open DNS භාවිතා කරලා බලන්න හිතුණා. ඒත් Mobile BroadBand වලට Open DNS හරියට වැඩ නැතිලු. ඒ වැඩෙත් අසාර්ථක වුණා.

කොහොම හරි මං මුහුණ පාලා තිබුණ මේ ගැටලුව දැකලා Web Hosting ආයතනයෙන් වෙන Unlimited සර්වරයකට මාරු වීමක් දුන්නා. මොකද ඒගොල්ලන්ටත් ඒක ප්‍රශ්නයක් වෙලයි තිබු‍ණේ. ඉතින් මට ආයේ පාරක් අලුතෙන් ගොඩනගන්න වූණා. හොඳ වෙලාවට පරණ Backups ගන්න පුළුවන් වූණේ. ඉතින් දැන් ෂෝක් එකට මොබිටෙල් ඇතුළුව සියලු අන්තර්ජාල සබඳතාවයන් ඔස්සේ Vidyawa.com වෙත පිවිසිය හැක.

මම මේ ගැන දැනගන්න ලැබුණ විදියට ලංකාවේ එක් IP ලිපින පරාසයක් SLT සහ මොබිටෙල් අනාගෙන ඇත. ඒ පරාසය තුළ පිහිටි සියලු වෙබ් අඩවි වලට SLT ADSL සහ Mobitel Broadband වලින් පිවිසීමේදී මේ ගැටලුවට බොහෝ විට මුහුණ පාන්නට සිදු වේ. ඉතින් අපිට මේකට කෙලින්ම Web Hosting ආයතනයට චෝදනා කරන්නත් බෑ. මොකද Dialog, Airtel, LankaBell සහ අනෙකුත් අන්තර්ජාල සබඳතාවල හොදට වැඩ නම් ඇයි SLT, Mobitel වල විතරක් වැඩ නැත්තේ? ඔවුන් මේ විදියට තනි තනිව පැමිණිලි කරනකම් බලන් ඉන්නේ ඇයි? ක්‍රමානුකූලව මේ සමස්ත ප්‍රශ්නයම විසඳලා දෙන්න බැරි ඇයි?

ඒ වගේම තව දෙයක්. SLT තුළින් මේ ප්‍රශ්නය එක් දවසකින් විසඳාගත හැකි වුවද Mobitel තුළින් මේ සඳහා සති ගණනක් පුරාවට යහපත් ප්‍රතිචාරයක් ලැබුණේ නෑ. සමහර විට ඔවුන් ඒ ප්‍රශ්නය පස්සේ විසඳුවාද දන්නේ නෑ. දැන් එසේ විසඳුවද වැඩක් නෑ. මොකද දැන් vidyawa.com කොහොමත් වැඩ. ඉතින් මොබිටෙල් ගැන මටනම් කියන්න තියෙන්නේ එගොල්ලන්ගේ පාර්භෝගික සේවාව තවදුටරත් හොඳින් දියුණු කළ යුතුයි. මම මේ ප්‍රශ්නයට කතා කරලාම රූ100කටත් වඩා වැඩියෙන් දුරකථන ගාස්තු සඳහා වියදම් වෙන්න ඇති. ඉන් බහුතරයක්ම පාරි‍භෝගික සේවා අමතලා.

අලුතෙන් ඩොමේන් නාම සහ වෙබ් හොස්ටින් සේවා ලබා ගන්න ඉන්න කට්ටියටත් උපදෙස් ටිකක් දෙන්න ඕනේ. ඕගොල්ලෝ යම් Web Hosting ආයතනයකින් Web Hosting මිලදී ගැනීමේදී ඒවා ලංකාවේ සෑම අන්තර්ජාල සබඳතාවයකටම වැඩද කියලා බලන්න. නැත්නම් පස්සේ හෙන කට්ටක් කන්න වේවි. පිටරටනම් මේ වගේ ගැටලු නැතුව ඇති. බැරිවෙලාවත් මේ වගේ ප්‍රශ්නයක් ආවොත් බය නැතුව මම ඉහත දක්වලා තියෙන දුරකථන අංක වලට පැමිණිලි කරන්න.මොකද අපි මසකට යම් පිරිවැයක් දරමින් අන්තර්ජාල සේවා සපයන්නාට ගෙවන්නේ නිකන්ම අන්තර්ජාල සබඳතාවයක් ලබාගන්න විතරක් නෙමේ. ඒ සබඳතාවයත් එක්කම හොඳ ගුණාත්මක සහ කාර්යක්ෂම සේවාවක් ලබාගන්නයි.

ඉතින් මම මෙච්චර දිගු කතාවක් ලිව්වේ ඔබව මේ ගැන දැනුවත් කරන්න ඖනේ හින්දයි. ඒ වගේම vidyawa.com අඩවිය ඒ ඒ අන්තර්ජාල සබඳතා තුළ ක්‍රියාත්මක වෙනවාදැයි පරීක්ෂා කර දුන් වැප්, දේදුනු ඇතුළු ඔන්ලයින් මිතුරන්ටත් ස්තූතියි. අවසානයේ ප්‍රශ්නය විසඳලා දුන් ewebcities හි නිරුත් සොයුරාටත් ස්තූතියි.෴

පළමු විභාගෙන් පස්සෙන්

2010-12-10T16:41:00.004+05:30

ඔන්න ගොඩ කාලෙකට පස්සේ තමා බ්ලොග් ලිපියක් ලියන්නේ. තව සතියක් විතර නොලියා හිටියොත් බ්ලොග් කියවන අඩවි වලින් මගේ බ්ලොගය ඉවත් වෙන්න පුළුවන්. ඒක හින්දයි මේක ලියන්න හිතුවේ. හැබැයි ඒ හින්දමත් නෙමේ. තව කියන්නත් ගොඩක් දේ තියෙනවා.

ඉතින් හා හා පුරා කියලා උසස් පෙළදී හමුවෙන පළමු වාර විභාගෙටත් මුහුණ දුන්නා. විභාගේ ගැන කියනවනම් හිතපු තරම්ම සාර්ථකත්වයක් ලබාගන්න බැරි වුණා. භෞතික විද්‍යාව, ඉංග්‍රීසි සහ GIT වලටනම් උඩින්ම ලකුණු තියේවි. අනිත් දෙකනම් සමත් වීමම ලොකු දෙයක්. කොහොම හරි ඒකේන් කියවෙන්නේ මම මහන්සි වුණා මදියි කියන එක. මීට වඩා ගොඩක් මහන්සි වෙන්න වෙනවා. අද ඉස්කෝලේ නිවාඩුත් හම්බවුණා. කොහොම හරි මේ දෙසැම්බරයේ අර දුන්න ප්‍රශ්න පත්‍රවලට ආයේ පාරක් ලියලා 99.9% ක ලකුණු මට්ටමක් කරා ඒමට මහන්සි වෙන්න ඕනේ. ඒ වගේම උසස් පෙළ ව්‍යාපෘතියත් මේ මාසේදී හැකි පමණින් ඉවරයක් කරන්න ඕනේ. පාසලේ වෙබ් අඩවිය නිර්මාණය කිරීම තමා ව්‍යාපෘතිය. කොහොමත් වෙබ් අඩවි නිර්මාණය පිළිබඳ හොඳ අත්දැකීම් ටිකක් Vidyawa.com අඩවිය නිසා ලැබුණා.

විද්‍යාව.කොම් අඩවිය ගැනත් ඕගොල්ලෝ මේ වෙද්දී දන්නවා ඇති. 2010 වසරේ හොදම සමූහ බ්ලොග් අඩවිය ලෙද විද්‍යාව.කොම් සිංහල බ්ලොග්කරණ තරගාවලියේදී සම්මනයට පාත්‍ර වුණා. ඒ අංශයෙන් සම්මානයක් හම්බ වේවි කියල මම හිතුවේ නෑ. නමුත් කිහිප දෙනෙකු මේක ඇඟයීමකට ලක් කරලා තිබුණ හින්ද සම්මානය ගැන පුංච් බලාපොරොත්තුවක් තිබුණා. සම්මානය ගැනනම් ගොඩක් සතුටුයි. එහි ස්තූති කතාව මෙතැනින් කියවන්න පුළුවන්. කොහොම වුණත් සම්මානය හිමි වුණේ තනි මට නෙමේ. විදයාව.කොම් වෙනුවෙන් දායක වුණු හැමෝටමයි.

සම්මානය ලැබුණු දවසත් අමතක නොවන දවසක්. "අසෙනිය කුසුම" උත්සවයේ අන්තිම හරියේදී තමා සම්මානය ගන්න අවස්ථාව ලැබුණේ. සම්මානය අරගෙන ඉවර වෙලා රාජකීය විද්‍යාලයෙන් එළියට බහින්න හදද්දීම මහ වැස්සක් කඩා පාත් වුණා. හැබැයි අසෙනිය කුසුමට ඒ පාර ඒකෙන් බාධාවක් වුණේ නෑ. මොකද ඒ වෙනකොට උත්සවයේ අවසානය ළඟා වෙලයි තිබුණේ. කොහොම හරි ඒකෙන් සිංහල බ්ලොග්කරුවන් කිහිප දෙනෙකේවත් දැකගන්න ලැබුණා. සුදාරක, මුචලින්ද , ආගන්තුකයා, පිටස්තරයා, malee_msg, මලින්ත ... සමහර අයගේ නම් නම් මතක නෑ. වැඩිය කතා කරන්න හම්බ වුණෙත් නෑ. මම වැස්ස නිසා අයියත් එක්ක යන්න ගියා. වැස්සට තෙමිලා මෝටර් බයිසිකලයත් වැඩ ක‍රෙත් නෑ. හෙන කට්ටක් කෑවා. පස්සේ කොහොමෙන් හරි ගොඩ ආවා. අන්තිමේදී රෑ 9.00 විතර වෙද්දී ගෙදර ආවා.

ඉතින් ඔන්න ඔහොම තමා සිද්ධි ටික. අන්තර්ජාල භාවිතයනම් දැන් ගොඩක් අඩු කරන්න වෙයි ඉදිරියට. නමුත් කොහොම හරි බ්ලොගය පැත්තෙත් ඇවිල්ලා යන්නම්. ආ.. තව දෙයක්. විද්‍යාව.කොම් පවත්වාගෙන යාමට කවුරුහරි දායක වෙන්න කැමතිනම් කියන්න. තාක්ෂණිකව හරි දායකත්වයක් දෙන්න පුළුවන් නම් ඒත් කමක් නෑ. නිතරම යාවත්කාලීන කිරීම තනිවම කරනන අමාරුයි. මොකද තාම කණ්ඩායමට කිහිප දෙනයි ඉන්නේ. කොහොමත් මම ඒක තව දියුණු කරන්න බලාපොරොත්තු වෙනවා. එහෙනම් දැනට නවතින්නම්.෴

කාලය රන් හා සමානයි!

2010-10-15T16:34:00.000+05:30

"කාලය රන් හා සමානයි" කියලා අපි පොඩි කාලේ අහලා තියෙන දෙයක්. පොඩි කාලේ ඒක එච්චර ඇඟට දැනුණේ නැති වුණාට ලොකු වෙනකොට තමයි ර‍‍ඟේ තේරෙන්නේ. මම එහෙම කිව්වේ ‍මට නම් දැන් දවසකට තිබිය යුතු කාලයත්(පැය විසි හතර) මදියි වගේ. උසස් පෙළත් සමඟ මම සිතින් කාර්යබහුල වෙලා. ගණන් දෙක තුනක් හදලා කාලා බීලා හිටියම දවසම යනකම් තෙරෙන්නේ නෑ. අනික නිදි මරලා පාඩම් කරන එක මට කොහොමටවත් පුරුදු නැති දෙයක්. ඒත් මම ඒක අත්හදා බලන්නයි ඉන්නේ.(කවදා කෙරෙයිද දන්නේ නෑ) කොහොමවුණත් අධ්‍යාපනයත් එක්ක කාල කළමණාකරණය කියන එක ගොඩක් වැදගත්. කාලය කළමණාකරණය කරගන්නකොට තමයි අර මුල් වාක්‍යය මතක් වෙන්නේ.

කොච්චර වැඩ අස්සේ වුණත් අන්තර්ජාලයට ගොඩ වඳින්නනම් අමතක වෙන්නෙම නෑ. ජීමේල්, ගූගල් රීඩරය, ෆේස්බුක්, විද්‍යාව.com යන ලැයිස්තුවනම් වරදින්නෙම නෑ., ඒක හරියට ඇබ්බැහි වීමක් වගේ. මොන දේට ඇබ්බැහි වුණත් පාලනය වැදගත්. ඉතින් පාලන, වාරණ, නියාමන ඔක්කොම කරගෙන මේ අවුරුදු දෙකාමාර කොහොමහරි ගෙවන්න වෙනවා. මේ බ්ලොගය වුණත් ලියන්න කම්මැලිකමේ හිටියේ. ඒත් බ්ලොග් කෙරුවාවනම් අත්හරින්න හිතක් නෑ. හිතේ ගොඩක් දේ තියෙනවා ප්‍රකාශ කර ගන්න බැරි. ඒවා එළියට දාගන්න තියෙන හොඳම තැනක් තමා බ්ලොගය. හැබැයි සමහර වෙලාව කියන්න ගොඩක් දේ තිබුණට ඒ දේවල් ලියන්න කම්මැලියි.

කොහොම හරි විද්‍යාව.com(vidyawa.com)අඩවියත් කරගෙන යන ගමන් මගේ මේ බ්ලොගයත් ඉංග්‍රීසි බ්ලොගයත් කරගෙන ඉදිරියට යන්න තමයි බලාපොරොත්තුව. එහෙනම් දැනට නවතින්නම්෴

කලකට පස්සේ නැවතත්

2010-09-29T22:46:00.001+05:30

ගොඩ කාලෙකට පස්සේ තමයි මම ලියන්නේ. අන්තිමට ලිව්වෙ ගිය මැයි මාසයේ. මාස 4ක පමණ කාලයක් තුල සිදු වු දේ ගොඩක් තියෙනවා. මාස 3ක් තුල මගේ බ්ලොගය යාවත්කාලීන නොකිරීම නිසා සිංහල බ්ලොග් කියවනයෙන්ද කොත්තුවෙන්ද ඉවත් කෙරුණා. නමුත් දැන් ආයෙත් එම බ්ලොග් කියවන දෙකටම එකතු වුණා. ඒ වගේම තවත් සුවිශේෂි දෙයක් තියෙනවා. මම මගේ බ්ලොගයේ නම ටිකක් වෙනස් කළා. ඒ අනුව අලුත් නම තමා රන්දිකගේ සිත් සටහන්. තවදුරටත් රන්දිකගේ Talks නම භාවිතා කළ යුතු නෑ. නම වෙනස් කළේ තේරුමක් ඇතිවයි. ගෙවී ගිය මාස කිහිපයේ මම තීරණය කළා බ්ලොගය හැකිතරම් සරලව ඉදිරිපත් කරන්න. ඒ කියන්නේ සරල චාම් බ්ලොග් අඩවියක් තුළ හොඳ අන්තර්ගතයක් පවත්වාගෙන යන්නයි හිතුවේ. සිංහල බ්ලොගයක් නිසා සම්පූර්ණයෙන් සිංහල සරල නමක් යෙදුවේ ඒ නිසයි.

ඉතින් දැන් ඉතින් මගේ ජීවිතයට බොහොම කාර්යයබහුල කාලයක් උදා වෙලා තියෙන්නේ. ඒකට ප්‍රධානම හේතුව තමයි මම දැන් උසස් පෙළ කරන සිසුවෙක්. ඉතින් උසස් පෙළ කරන ගමන් මගේ බ්ලොග් අඩවියත් පවත්වාගෙන යනවා. හැබැයි අධ්‍යාපනයට මුල් තැන දෙන්න වෙනවා.

තව දෙයක් !මගේ අනුමානය හරිනම් මගෙ බ්ලොග් අඩවියට මේ මසේදී අවුරුද්දක් පිරෙනවා. බ්ලොගය පටන් අරගෙන ගොඩක් කල්වුනත් සිංහලෙන් පිළිවෙලකට ලියන්න ගත්තෙ ගිය අවුරුද්දේ. ඉතින් හරියට පටන් ගත්ත දිනයක් කියන්න අමාරුයි. කෙසේ හෝ වේවා මෙතෙක් කල් මගෙ බ්ලොගය කියවපු ප්‍රතිචාර එක් කරපු සියලු දෙනාටම ස්තුතියි! ඒ වගේම මේ අවුරුද්දක කලය තුල සිංහල යුනිකෝඩ් භාවිතා කරන සොයුරු සොයුරියන් ගොඩ දෙනෙක් දැන හදුනගත්තා. ඒ හැමෝවම මේ වෙලාවේ මතක් කරන්න කැමතියි!

එහෙනම් නැවත හමුවෙමු෴

සිංහල අපේ නමේ මුලකුරු

2010-05-15T08:59:00.001+05:30

අද මම කියන්න යන මාතෘකාව ගැන කාලයක් ලක්බිම පුවත්පතේ සංවාදාත්මක ලිපි පෙළක් ගියා. ඉතින් මම හිතුවා ඒ මාතෘකාව බ්ලොග් අවකාශයටත් ගෙන එන්න ඕනේ කියලා. සෑම මනුස්සයෙක් සඳහාම ඔහුට ආවේණික නමක් තියෙනවා. ඔහුගේ හෝ ඇයගේ නමේ ස්වභාවය තීරණය වෙන්නේ ඔහු/ඇය ජීවත් වන සංස්කෘතික සහ භාෂා වටපිටාව අනුවයි. හැමෝටම එක නමක් තිබ්බට මදි. මොකද එකම නම තියෙන අය ගොඩක් ඉන්න පුළුවන්. ඉතින් එතකොට නම් ගණන දෙකක් හෝ ඊට වැඩි වෙනවා. මෙසේ නම් ගණන වැඩි වෙනකොට අපිට ඕක කොහේ හරි ලියන්න ගියාම හෙන වදයක් වෙනවා. ඒ වෙලාවට අපි නමේ මුල් කොටස(බොහෝ වෙලාවට වාස ගම) කෙටිකර අවසාන කොටස විතරක් ලියනවා.

උදාහරණයක් විදියට කිරිවැල්ලේ මුදියන්සලාගේ දොන් මංජුල ප්‍රසාද් යන නාමය අපි සාමාන්‍යයෙන් ලිවීමට පුරුදු වෙලා තියෙන්නේ K.M.D. මංජුල ප්‍රසාද් ලෙසටයි තවත් විටෙක අග නම පමණක් ඉතුරු වෙන්නට අනෙක් මුල් කොටස් වලට මුල අකුරු දානවා. එතකොට ඉහත උදාහරණය අනුව ලියවෙන්නේ K.M.D.M. ප්‍රසාද් ලෙසටයි. ඉතින් ඔය විදියට තමා අපි නම ලියන්න පුරුදු වෙලා තියෙන්නේ.

දැන් අපි ඉහත ලියපු උදාහරණය දිහා ‍හොදට බලන්න. එහි මුලකුරු තියෙන්නේ ඉංග්‍රීසි අක්ෂර වලින්. අග කොටස තියෙන්නේ සිංහලෙන්. ඔතන තමා ප්‍රශ්නය මතු වෙන්නේ. ලියන්න හදන්නේ සිංහලෙන්. ඒ වුණාට මුලකුරු ලියන්නේ ඉංග්‍රිසියෙන්. එතකොට ඉහත උදාහරණය මෙහෙමයි ලියවෙන්නේ Kiriwelle Mudiyanselage Don Manjula ප්‍රසාද් ලෙසයි. බලන්න එතකොට බාගයකටත් වැඩි ප්‍රමාණයක් ඉංග්‍රීසියෙන්. නමුත් සිංහලෙන් අග නම ලියලා. ඔන්න ඔහොම තමා බහුතරයක් ශ්‍රී ලාංකීය ජනතාව ඕනෑම තැනක ලියන්නේ. ඇත්තටම මෙතන ප්‍රශ්නය තියෙන්නේ සිංහලෙන් නමක් ලියනවනම් සම්පූර්ණයෙන් සිංහලෙන්ම ලිවිය යුතුයි. ඒ හැර අන් භාෂාවකින් නමක් ලියනවනම් සම්පූර්ණයෙන් එම භාෂාවෙන් ලිවිය යුතුයි. ඒ අනුව ඉහත උදාහරණය K.M.D.M. Prasad කියා ඉංග්‍රීසියෙන් ලිවීම වඩාත් සුදුසුයි. කාට හරි මේක අපේ සිංහල භාෂාවෙන් ලියන්න ඕනේ නම් එය කි.මු.දො.ම. ප්‍රසාද් ලෙස ලිවිය විය යුතුයි. එයයි නිවැරදි ක්‍රමය. අපි කලින් පුරුදු වෙලා හිටිය ක්‍රමය අනුව මගේ නම කියනව නම් S.S.R. සිල්වා. සම්පූර්ණ සිංහලෙන්ම ලියනවනම් සි.ශි.ර. සිල්වා. (ඒ නමෙත් පොඩි ගතියක් තියෙනවා)

මම හිතන්නේ දැන් අපි හැමෝම දන්නවා නිවැරදි ක්‍රමය මොකක්ද කියලා. සමහරවිට මේ විදියට අපි මෙතෙක් කල් ලිව්වේ අපේ නොදැනුවත්කම නිසා වෙන්න ඇති. සමහර විට දැන දැනම වෙන්න ඇති. සමහරු කියන්නේ බ්‍රිතාන්‍ය යටත් විජිත සමයේ උරුම වූවක් අද දක්වා විකාශනය වීමේ ප්‍රතිඵලයක් ලෙස අපි මේ ක්‍රමේට පුරුදු වෙන්න ඇති කියලා. ඒ කොහොම වුණත් දැන් අපි මේ වැරැද්ද හඳුනා ගත්තා.

දැන් මේක දිහා අපි තව පැත්තකින් බලමු. මෙන්න මේ උදාහරණය බලන්න. කෑගළුගේ දඹරගල රණවීරලාගේ තිළිණ ගුණරත්න. මේ නම අපේ සිංහල ක්‍රමේට ලියූ විට කෑ.ද.ර. තිළිණ ගුණරත්න ලෙස වේ. කවුද කැමති තමාගේ නම ඉස්සරහ මේ වගේ උපහාසාත්මක වදනක් දාගන්න. ඇත්තටම එතන කෑ.ද.ර. යනු තනි වචනයක් නොවේ. එය තිත් යොදා කෙටිකළ නම් පෙළක්. නමුත් බැලූ බැල්මට එය පෙනෙන්නේ "කෑදර" යනුවෙන්. ඉතින් මේ වගේ තමාගේ නම ඉස්සරහින් අපහාස වචන නිර්මාණය වෙනවට කවුරුවත් කැමති නෑ. ඒක හින්දා සමහර අය සිංහල ක්‍රමේ අතහැරලා ඉංග්‍රීසි ක්‍රමේට මුලකුරු ටික ලියනවා. එතකොට අර වගේ විහිළුවක් සෑදෙන්නේ නැති නිසා. නමුත් මේ උදාරණය දෙස බලන්න. මාළඹේ ආරච්චිලාගේ දොන් සිරිපාල. මේක ඉංග්‍රීසී මුලකුරු වලින් ලිව්වොත් M.A.D. සිරිපාල. MAD වචනයේ සිංහල තේරුම සිහිවිකල් යන්නයි. සමහරවිට ඉංග්‍රීසි නොදන්නාකමට සමහරු ඒ ගැන නොසිතන්නට පුළුවන්. නමුත් සිරිපාල දැනගත්තොත් ඵ් වචනයේ තේරුම "සිහිවිකල්" කියලා ඔහු ඉංග්‍රීසියෙන් මුලකුරු ලියන එකක් නෑ. ඉතින් මෙහෙම බලපුවම එක එක අයට එක එක ගැටලු මතු වෙනවා.

නමුත් මේ සියල්ලටම එක් විසඳුමක් තියෙනවා. ඒ තමා ආකල්පමය වෙනසක් ඇති කර ගැනීම. කු.රු. සෝමාවති යන නමේ මුලකුරු කාට හරි පුළුවන්නම් "කුරු" යනුවෙන් නොසිතා එය කෙටි කළ නම් පෙළක් පමණක් කියා සිතන්නට, එහි අර්ථය ඔහු/ඇය තුල මේ පිළිබඳව ආකල්පය වෙනස් කරගෙන ඇති බවයි. අද අපිට මේ සිංහල ක්‍රමේට මුලකුරු පාවිච්චි කරන ජනප්‍රිය දෙන්නෙක් ඉන්නවා. ඒ තමා දි.මු.ජයරත්න සහා වි.ජ.මු. ලොකු බණ්ඩාර යන අය. ඉතින් ශ්‍රී ලංකාවේ සැවොම ‍මේ පිළිබඳව යම් හෝ ආකල්පමය වෙනසක් ඇති කරගත් දාට අපිට අපේ මව්බසින් අපේ නමේ මුලකුරු ලිවිය හැක.

ඉතින් මම මේ ගැන ලිව්වේ මේ මාතෘකාව මගේ අදහසුත් අන් අයගේ අදහසුත් එකට සාරාංශගත කරලා. ඉතින් ඔබේ අදහසුත් මේ ලිපියට ලබා දෙන්න.

මගේ අලුත් වසම සහ අලුත් වැඩ

2010-05-07T01:44:00.003+05:30

ඔන්න ටික කාලයකට පස්සේ තමා මම ලියන්නේ. නිකන්ම නෙමේ අලුතෙන් මගේම කියලා වසම් නාමයක්(Domain Name) යටතේ තමා අද ලියන්න පටන්ගත්තේ. නමුත් පොඩි DNS අවුලක් හින්දා blog.shiroshan.info සබ් ඩොමේනය මේ බ්ලොගේට කස්ටම් ඩොමේනයක් විදියට දාගන්න බැරුවයි හිටියේ. නමුත් දැන් ඒක හරි! LK Servers ආයතනය සිංහල බ්ලොග්කරුවන්ට දුන්න විශේෂ දීමනාව හින්දා තමා මේක ලැබුණේ. ජීවිත කාලයටම නොමිලේ 10GB වෙබ් ඉඩක් සමඟ අවුරුද්දක් සදහා නොමිලේ ඩොමේන් නාමයක්. ඉතින් මමත් අතහැරියේ නෑ. කොහොම හරි ගත්තා. ඉතින් මාව මේ දීමනාව පිළිබඳව මුලින්ම දැනුවත් කළ ගයන්තගේ බ්ලොගය මම මේ වෙලාවේ මතක් කරන්න කැමතියි. මේ අවස්ථාව උදා කර දුන් සිංහල බ්ලොග්කරුවන්ගේ සංසදයටත් මාගේ ස්තූතිය පිරිනමන අතර LK Servers ආයතනයටත් ඔවුන්ගේ කාර්යය මණ්ඩලයටත් මාගේ ස්තූතිය පිරිනමනවා. ඒ වගේම තාක්ෂණික උපදෙස් වලින් මට සහය වුණු සියලුම මගේ අන්තර්ජාල මිතුරන්ට ස්තූතියි!

ඉතින් මගේ වෙබ් ලිපිනය තමා www.shiroshan.info. ඒකට මම අලුත් අදහසකට අනුව කළු පෑනකින් වෙබ් නිර්මාණය කළා. ගිහිල්ලම බලලා කියන්නකෝ ගුණ දොස්. ඕකත් ඉතින් හදිසියට වගේ කළේ. පස්සේ වෙලාව හම්බ වුණොත් හොඳ ඩිසයින් පාරක් දානවා.

දැන් මම කියන්නේ වෙන කතාවක්. මම 2009 සාමාන්‍ය පෙළට ලිව්වනේ. කොහොම හරි ඉතින් A 5කුයි B 4කුයි තියෙනවා. ඊට පස්සේ උසස් පෙළත් නොකර බෑනේ. ඉතින් ඒකට මම ගණිත අංශය තෝරාගත්තා. පෝඩ්ඩක් අමාරු වැඩක්!(ගණිතයට Bනේ) ඉතින් දැන් මම 2012 A/L විභාගය අපේක්ෂිත සිසුවෙක්. ඔන්න ඔහොම ඉද්දී අහන්න ලැබුණා 2009 සිට උසස් පෙළට ICT (GIT නෙමේ) කියලා විෂයයක් ඇතුලත් කරලා කියලා. මම ඉතින් ICT වලට විශේෂයක් දක්වන නිසා ඒ විෂයය කරන්න ආසාවක් ඇති වුණා. අපේ ඉස්කොලේටත් එම විෂයය පටන් ගන්නවා කියලා ආරංචියි. ඉතින් රසායන විද්‍යාව(ටිකක් ගිරවු ගතිය තියෙන විෂයයක්නේ) අයින් කරලා ICT දාගන්න උත්සහයක් දීලා බලන්න ඕනේ. කොහොම හරි වැඩේ ගොඩ දාගන්නනේ ඕනේ. සරසවි වරම් ලබා ගැනීමේ ආශාවත් තදේටම තියෙනවා. හිහ් හී!

ඔන්න එතකොට මගේ ඔළුවට අදහසක් ආවා විද්‍යා දැනුම ‍ලබා දෙන බ්ලොග් අඩවියක් පටන්ගන්න. ඒ‍ක මම We Are Scientific! කියලා නම් කළා. ඒකේ මූලික අරමුණ වුණේ මගේ උසස් පෙළ විද්‍යා ඥාණය වැඩි දියුණු කර ගැනීමත් මා ලබා ගත් දැනුම අනෙක් අයට බෙදා දීමත්. පස්සේ මම හිතුවා මම විතරක් නොලියා තව කට්ටිය එකතු කරගෙන ඒක දිගටම කරන්න. ඉතින් ඒ කාර්යයට ඔබලා සියලුදෙනාට මම ආරාධනා කරනවා. තව බ්ලොග් අඩවියේ ටෙමප්ලේට් එකත් ටිකක් දියුණු කරගන්න ඕනේ. තව ඩොමේන් නාමයකුත් ගන්න බලාපොරොත්තු වෙනවා. ඇත්තටම මට ඕන වුණේ එමගින් සම්ප්‍රදායික විද්‍යා පාඩමක් නොකර රසවත්ව විද්‍යාවේ සුන්දරත්වය නොදන්නා කොනකුට ලබා දෙන්නයි!

ඉතින් දැන් මම මේ ලිපියට සමු දෙනවා. මේ ලිපිය කියෙව්වට ඔබට බොහොම ස්තූතියි! ඊළඟ ලිපියෙන් හමුවෙමු෴

පරම අණුව ගැන කියන කතා

2010-04-09T18:33:00.002+05:30

අද ලියන්නේ රසායන විද්‍යාව පිළිබදවයි. උසස් පෙළදී ඉගෙන ගත්ත පාඩමක් ඇසුරෙන් තමා මේක ලියන්නේ. විද්‍යාව කියන්නේ හරිම රසවත් විෂයයක්. හරියට කතන්දරයක් වගේ. මට නම් ඒ ඔස්සේ අලුත් දේ ඉගෙන ගනිද්දී පුදුම ආසාවක් ඇති වෙනවා. නමුත් බොහෝ ශිෂ්‍යයයන් නූතන තරගකාරී විභාග ක්‍රමයට හසු වී මේ රසවත් විෂයය අමාරු දෙයක් ලෙස බැහැර කරනවා. විද්‍යාව කියන දේ අපි අප විසින්ම තේරුම්ගෙන අවබෝධ කරගත යුත් දෙයක්. ඒ නිසා කට පාඩමට වඩා තේරුම් ගැනීමයි වැදගත්.

මම හිතනවා පරමාණුව පිළිබඳ ඔබට යම් දැනුමක් ඇති කියලා. පරමාණුව බොහො දෙනෙකු සලකන්නේ පදාර්ථයේ තැනුම් ඒකකය ලෙසයි. නමුත් පසු කාලීනව උප පරමාණුක අංශු සොයා ගැනීමත් සමඟ පරමාණුව කුඩාම අංශුව යන මතය ප්‍රතික්ෂේප වුණා. නූතන පිළිගැනීම අනුව පරමාණුවේ ඇති න්‍යෂ්ටිය වටා ඉලෙක්ට්‍රෝන තරංගාකාරව ගමන් කරයි. න්‍යෂ්ටියේ අන්තර්ගතය සලකා බැලුවොත් ඒ තුල ප්‍රෝටෝන සහ නියුට්‍රෝන වලින් සමන්විත වේ. මැත කාලීනව ඒ තුළ තවත් විවිධ වර්ගයේ උප පරමාණුක අංශු ඇති බව සොයා ගැනූණා. නමුත් බොහෝ දෙනෙකු අධ්‍ය‍යනයේ පහසුවට ප්‍රෝටෝන සහ නිය්‍රට්‍රෝන වලට මුල් තැන දෙනවා. ඉතින් මේ පරමාණුව පිළිබඳ ආකෘතියට අනුව න්‍යෂ්ටිය එක් මධ්‍යයකට ගොනු වී ඇති ඉතා කුඩා අංශු එකතුවකි. එම න්‍යෂ්ටිය වටා ඉතාමත් ඈතින් මිනිසාට ගෝචර වන ස්කන්ධයක් නැති තරම් ඉතා කුඩා ඉලෙක්ට්‍රෝන කැරකෙයි.

දැන් මම කියන්න යන්නේ මේ න්‍යෂ්ටිය තුල සිදුවන එක් ක්‍රියාකාරකමක් ගැන. ප්‍රෝටෝනය නැමැති අංශුව ධන ආරෝපිතයි. නියුට්‍රෝනය අනාරෝපිත හෙවත් උදාසීනයි. ඉතින් න්‍යෂ්ටියේ මෙසේ ධන ආරෝපිත අංශු එකට එකතු වී තිබෙන්නට කොහෙත්ම බැහැ.

මොකද ඒවා සියල්ල ධන ආරෝපිත නිසා එකිනෙකට විකර්ෂණය වෙනවා. එතකොට පරමාණුව බිඳ වැටෙනවා. ඒ නිසා මෙය මෙසේ බිඳ නොවැටී තිබීමට යම් හේතුවක් තිබිය යුතුයි. එන්න එහෙම ඉන්නකොට තමා මීසෝනය නැමැති උප පරමාණුක අංශුව සොයා ගැනුණේ. මේ අංශුව ඍණ ආරෝපිතයි. හරියට ඉලෙක්ට්‍රෝනයක් වගේමයි. හැබැයි මේක පිහිටන්නේ පරමාණුවේ න්‍යෂ්ටිය තුලයි. දැන් මම වෙනස් කතාවක් කියන්නයි යන්නේ ඒ තමා නියුට්‍රෝනය සෑදී තිබෙන්නේ ප්‍රෝටෝනයක් සහ මීසෝනයක් එකතු වීමෙනි. ප්‍රෝටෝනයට +1 ආරෝපණයක් සහ මීසෝනයට -1 ආරෝපණයක් තියෙනවා කියලා හිතන්නකෝ. එතකොට මේ දෙක එකතු වුණාම ආරෝපණය 0 වෙනවනේ. එනම් උදාසීන වෙනවානේ. එන්න එහෙම තමා නියුට්‍රෝනය උදාසීන වුණේ. එතකොට මෙසේ ප්‍රෝටෝන අතර නියුට්‍රෝන පිහිටන විට විකර්ෂණය වීමක් සිදුවන්නේ නෑ. එතකොට න්‍යෂ්ටිය බිඳ නොවැටී පවත්වාගෙන යාමට හැකියි.

පහත නිල් පැහැති බෝලය ප්‍රෝටෝනයක් කියා නම් කරමු. රතු පාට බෝලය මීසෝනයක් කියා නම් කරමු. එතකොට නිල්පැහැති බෝලය තුල ඇති රතු පාට බෝලය අපි නියුට්‍රෝනයක් කියා නම් කරමු. දැන් අපි උදාහරණයක් ලෙස හයිඩ්‍රජන් පරමාණුවේ ටිට්‍රියම් සමස්ථානිකය ගනිමු. ටිට්‍රියම්හි ඉලෙක්ට්‍රෝන 1කි, ප්‍රෝට්‍රෝන 1කි, නියුට්‍රෝන 2කි.

ඉහත පරිදි න්‍යෂ්ටියේ අංශු සැකැසී ඇති විට විකර්ෂණයක් සිදු නොවේ. P1 ප්‍රෝටෝනයට විකර්ෂණය වීමට අනෙක් අංශූන් ඉඩ නොතබයි. මොකද මීසෝන 2ක් මගින් P2 සහ P3 උදාසීන කර ඇති බැවිනි. තව දෙයක් මේ මීසෝන එක් ප්‍රෝටොනයකට පමණක් බැඳී නොසිටී. මොකද එම ප්‍රෝටොනය සමග බැදීම ඇති වූ විගස එය උදාසීන වේ. එවිට එම මීසෝනය තවත් ප්‍රෝටොනයක් සොයා යයි. මෙසේ මීසෝන තව එකකින් තවත් එකකට පනිමින් කල් ගෙවයි. මෙය කෙතරම් වේගයෙන් සිදුවෙනවා දැයි කිවහොත් කිසිම වෙලාවක අපට මෙය ප්‍රෝටොනයක් යයි වෙන්කර හදුනා ගත නොහැකි තරම්ය.

ඉතින් මෙසේ පරමාණුක ක්‍රමාංකය වැඩි වන විට ප්‍රෝටෝන ගණන වැඩි වෙනවා. නමුත් මීසෝන ගණන ප්‍රෝටොන ගණනට සාපේක්ෂව අඩු වෙන්නට පුවවන්. එතකොට මීසෝන වලට එක් ප්‍රෝටෝනයක සිට කුමන ප්‍රෝටෝනයට පැනිය යුතුද කියා අර්බුදකාරී තත්ත්වයක් ඇති වෙනවා. ඔන්න ඔතනදී සමහර ප්‍රෝටෝන එකිනෙකට මුණගැසී විකර්ෂණය වෙන්න පටන් ගන්නවා. එතකොට න්‍යෂ්ටි‍ය බිඳ වැටී ප්‍රෝටොන ශක්තිය ලෙස ඉවතට පිටවී යනවා. ඔන්න ඕකට විකිරණශීලිතාව කියන්නත් පුළුවන්.

ඔන්න ඔහොම තමයි කතාව. ඉතින් ඔය කිව්ව කතාව හෙට වෙද්දී වෙනස් වෙන්නත් පුළුවන්. මොකද විද්‍යාවේදී එක් පරීක්ෂණ ප්‍රතිඵලයකින් සනාථ වන කරුණු තව විද්‍යාඥයෙක් තවත් පරීක්ෂණයකින් බිඳ දමන්නට පුළුවන්. මේ මං ලිව්වේ මගේ ටිකිරි මොළේට තේරුණ ටික තමා. වැරදි තියෙනවනම් පෙන්වා දෙනු මැනව.

ගූගල් සිංහල පරිවර්තකයට දායක වෙමු

2010-03-16T12:19:00.001+05:30

අද මේ ලෝක ව්‍යාප්ත ජාලයේ(WWW) ඇති තොරතුරු කන්දරාව දිනෙන් දින දෙගුණ තෙගුණ වෙනවා මිසක් නැවතීමක් නෑ. ඇත්තටම මෙහි ඇති තොරතුරු වලින් අඩකට වැඩි ප්‍රමාණයක් ලියැවිලා තියෙන්නේ ඉංග්‍රීසි බසිනි. දැන් දැන් යුනිකේත වගේ භාෂා සම්මුතීන් ප්‍රචලිත වීම නිසා ලෝකයේ විවිධ රටවල් තම ස්වභාෂාවෙන් ලෝක ව්‍යාප්ත ජාලයට සීඝ්‍රයෙන් තොරතුරු මුදාහරිමින් සිටිනවා. උදාහරණයක් ලෙස ශ්‍රී ලංකාව තුල සිංහල යුනිකේතය බිහිවීම ගත හැක. සිංහල යුනිකේතය නිසා අද සිංහල බ්ලොග් අඩවි මගින් ලෝක ව්‍යාප්ත ජාලය තුල සිංහල අන්තර්ගතය වැඩි කරමින් පවතී. නමුත් මෙය අනෙක් ලෝක ව්‍යාප්ත භාෂා (ඉංග්‍රීසි, චීන, ජපන්....) වලට තරගයක් දිය හැකි මට්ටමේ තොරතුරු සම්පතක් නොවේ.

මේ නිසා අන්තර්ජාලය තුල ඇති ඉංග්‍රීසි භාෂාවෙන් ලියැවී ඇති තොරතුරු සම්පත තම ස්වභාෂාවෙන් අවබෝධ කර ගැනීමට එක් එක් අය එක් එක් උපක්‍රම යෙදුවා. එවැනි ඉතා ජනප්‍රිය ක්‍රමයක් තමා ගූගල් පරිවර්තකය.(Google Translator) එමගින් විවිධ වෙබ් අඩවි වල ඇති තොරතුරු අන්තර්ගතය තමා කැමති බසකට හරවා ගත හැක. මෙය ස්වයංක්‍රීය මාර්ගගත මෘදුකාංගයක්(Automation Online Software) වන නිසා ඉතා පහසුවෙන් ඕනෑම දෙයක් ඕනෑම බසකට පරිවර්තනය කර ගත හැකියි.

නමුත් තවමත් මෙහි ස්වයංක්‍රීය පර්වර්තනයට ලොව පුරා ඇති සියලුම භාෂා ඇතුලත් කර නොමැත. ඉතින් ලංකාවේ අපට වැදගත් වන සිංහල භාෂාවත් මේ ලැයිස්තුවට ඇතුලත් වී නොමැත. නමුත් ගූගල් විසින් අපේ භාෂාවත් මේ ස්වයංක්‍රීය පරිවර්තනයට ඇතුලත් කර ගැනීමට අපට අවස්ථාවක් සලසා දීලා තියෙනවා. ඒ තමා ගූගල් පරිවර්තන උපකරණ කට්ටලය(Google Translator ToolKit). මෙහිදී තමා තෝරා ගත් ඉංග්‍රීසි බසින් ලියැවී ඇති ගොනුවක්(Word/Writer/Rich text) හෝ විකිපීඩියා ලිපියක්(Wiki Article) හෝ වෙබ් පිටුවක් වාක්‍යයෙන් වාක්‍යය සිංහල භාෂාවට පර්වර්තනය කල යුතුයි. මේ සදහා ඔබ ඔබේ ගූගල් ගිණුමට ලොග් වී http://translate.google.com/toolkit?hl=en&layout=1&eotf=1 යන සබැදියට යන්න. එහි Upload බොත්තම ඔබා අවශ්‍ය ලේඛනය තෝරාගෙන පරිවර්තන කටයුතු සිදු කල හැක. මෙය යාන්ත්‍රික පරිවර්තන කාර්යයක් කියා හදුන්වන්න පුළුවන්.

මෙසේ අදාළ භාෂාවෙන් සැලකිය යුතු ම්ට්ටමේ තොරතුරු ප්‍රමාණයක් පරිවර්තනය වී අවසන් වූ විට ඔවුන් එම භාෂාව ඔවුන්ගේ ස්වයංක්‍රීය පරිවර්තන ලැයිස්තුවට ඇතුලත් කර ගනී. එතැනින් පසු ගූගල් විසින් අදාළ පුද්ගල සහය ඇතුව ඉංග්‍රීසි ලිපියක් දුන් විට ස්වයංක්‍රීයව එම භාෂාවට පරිවර්තනය වන ආකාරයට එම මෘදුකාංගය යාවත්කාලීන කරනවා. ඉතින් අන්තර්ජාලය තුල සිංහල අන්තර්ගතය වැඩි කිරීමට උත්සහ දරන අපට දැන් තවත් කාර්යයක් පැවරිලා. ඒ තමා සිංහල බසත් කෙසේ හෝ ගූගල් පර්වර්තකයට ඇතුලත් කර ගැනීම. ඉතින් ඔබත් හැකි ආකාරයෙන් ඉංග්‍රීසි ලිපි කිහිපයක් සිංහල භාෂාවට හරවන්න උත්සහ ගන්න. මතක ඇතුව මුල් භාෂාවට ඉංග්‍රීසි බසත් පරිවර්තනය කල යුතු භාෂාවට සිංහල බසත් තෝරා ගන්න.

මමත් මේ ගැන මුලින්ම දැන ගත්තේ සිසු හවුල ගූගල් සමූහයෙන්. එහි විමල් මහතා විසින් පළ කරන ලද විස්තරයක් ඇසුරෙනි.

SixthSense Technology

2010-03-06T11:41:00.002+05:30

SixthSense Technology ගැන ඔබලා සමහරවිට අහලා ඇති. මෙම තාක්‍ෂණය අත්හදා බැලීමේ වීඩියෝ පට ඔබ මින් පෙර නරඹා තිබුණනම් ඔබ පුදුම වනු ඇත. මමත් මේ ගැන මුලින්ම දැනගත්තේ තාරකගේ බ්ලොග් ලිපියෙනි. මෙම නවතම තාක්‍ෂණය මගින් දැනට පවතින ඩෙස්ක්ටොප් පරිගණක කට්ටල සහ විවිධ දෘඩාංග පද්ධති තැන තැන ගෙන යාම අත්‍යවශ්‍ය නෑ. ඇත්තටම මෙම තාක්‍ෂණයේ නිර්මාපකයා වන ප්‍රනාව් මිස්ත්‍රි ඉන්දියානුවෙකි. ඔහු ඇමෙරිකාවේ මැසචුසෙට්ස් තාක්ෂණ ආයතනයේ(MIT) ඉගෙනුම ලබන ශිෂ්‍යයෙකි. ඔහුට මෙම තාක්‍ෂණය නිර්මාණය කිරීම සදහා තවත් ශිෂ්‍යයෝ දෙදෙනෙක් උදව් වී තිබෙනවා.

මේ SixthSense තාක්ෂණයට මේ නම ලැබිලා තියෙන කතාවත් අපූරුයි. ඔය ගොල්ලා දන්නවනේ පංච ඉන්ද්‍රීයයන්. මේ ඉන්ද්‍රීයයන් පහට එකතු වූ නවතම උපාංගයත් සමග තමා අපි මේකට SixthSense තාක්ෂණය කියන්නේ. ඉතින් මොකක්ද මේ නවතම උපාංගය කියලා ඔයගොල්ලෝ බලනව ඇතිනේ. ප්‍රනාව් ඇතුලු කණ්ඩායම ගොඩක් පර්යේෂණ කරලා තමයි මෙම ඉලෙක්ට්‍රොන්ක උපාංගය සකස් කරලා තියෙන්නේ. ඇත්තටම කිව්වොත් මේක බෙල්ලේ එල්ලා ගත හැකි උපාංග කට්ටලයක්. මෙහි කැමරාවක් හා තල දර්පණයක් සහිත ප්‍රක්ෂේපකයකින් (Projector) සමන්විත වෙනවා. ඊට අමතරව ජංගම දුරකථනයක් ද අවශ්‍ය වෙනවා. ජංගම දුරකථනය හරහා තමා අන්තර්ජාලයට සම්බන්ධ වී සන්නිවේදනය සිදුකර ගන්නේ. දැනට ගණන් බලා ඇති ආකාරයට මේකෙ වටිනාකම ශ්‍රී ලංකා රුපියල් වලින් 36000ක් විතර වෙනවා. මෙමගින් ඕනෑම මතුපිටක්(Surface) මත තමාට අවශ්‍ය කටයුතු කර ගැනීමට පුළුවන්. මේක හරියට බහුකාර්යය උපාංගයක් වගේ. මේකෙන් අපිට අවශ්‍ය කාර්යය ඉතා සරලව සහ පහසුවෙන්(Easy & Seamless Access) කරගන්න හැකියාව තිබෙනවා.

මෙහි වැදගත්ම දෙය වන්නේ මෙම උපාංගය ක්‍රියා කරවන මෘදුකාංගයයි. මෙම මෘදුකාංගය ප්‍රනාව් විසින් විවෘත කේත මෘදුකාංගයක්(FOSS) බවට පත් කරලා තියෙනවා. ඉතින් අනාගතයේදී මෙම මෘදුකාංගය වැඩි වැඩියෙන් දියුණු වෙයි කියන එක තමයි කාගේත් බලාපොරොත්තුව.

මේ ගැන වැඩිදුරටත් දැනගන්න පහත වීඩියෝ පටය බලන්න. මෙම තාක්ෂණය ක්‍රියාත්මක වන ආකාරය පිළිබඳව ප්‍රනාව්ගේ ගුරුවරයා විසින් කරන ලද කතාවක් මෙහි අන්තර්ගත වෙනවා. ඒක බලපුවාම මම මෙච්චර වෙලා කියන්න හදපු දේ ඔය ගොල්ලන්ට නිකන්ම පැහැදිලා වෙව්.

වීඩියෝ පටය නැරඹුවානම් දැන් මේක ගැන හිතන දේත් පහලින් සටහන් කරලාම යන්න.

අභිරහස ඔබයි

2010-03-05T21:56:00.000+05:30

දෑස් ඇරෙන

මේ විමතියෙන්

කලබා මා හඳ

කුතුහලයෙන් පිපාසිත වූ

ඉඩෝරයක තනි වී

ඉබාගාතේ යන කලට

පිහිටට කවුදෝ එන්නේ

අතරමං වී සිටිනා මට

මාවත හදන

ඒ දිව්‍ය අභිරහස ඔබයි

සුපිරි බොලිවුඩ් වාර්තා

2010-02-23T10:53:00.000+05:30

ඔන්න අද කියන්න යන්නේ බොලිවුඩ් සිනමාව තුල වැඩිම ආදායමක් ඉපයූ චිත්‍රපට ගැන. කලින් ලිපියේ ලෝක සිනමාව ගැන කතා කලා මතක ඇතිනේ. බොලිවුඩය කියන්නේ ඉන්දියාවේ ඇති අති දැවැන්ත සිනමා කර්මාන්තයක්. හොලිවුඩයට පමණයි දෙවැනි වෙන්නේ. දැන් දැන් ස්ලම්ඩෝග් මිලියනර්, වොටර් වැනි හොලිවුඩයත් බොල්වුඩයත් අතර හවුල් නිෂ්පාදන බිහිවෙනවා. ඒ තරම්ම ලොව පුරා බොලිවුඩය ජනප්‍රියයි. ඉන්දියාවේ තව සිනමා කර්මාන්තයක් තියෙනවා. ඒ තමා කොලිවුඩය(දෙමළ සිනමාව). මේකත් බොලිවුඩයේ ආභාෂය ලබපු එකක්. තාම බොලිවුඩය තරම්ම දැවැන්තබාවයක් නෑ ඒකට.කොහොමහරි දැන් මේ කියන්න යන්නේ බොලිවුඩයේ වැඩිම ආදායමක් ඉපයූ චිත්‍රපට 30 ගැනයි. මේකේ හැබැයි වගු 2ක් තියෙනවා. එකක් පැරණි චිත්‍රපට ටික. අනෙක අලුත් චිත්‍රපට ටික. මේ වගු දෙකම සන්දන්දනය කරන්න ටිකක් අමාරුයි. මොකද ඒ කාලේ උද්ධමනයයි, දැන් ඉන්දියාවේ උද්ධමනයයි වෙනස්නේ. අනෙක ජනගහණයත් දැන් ගොඩක් වැඩි වෙලානේ. ඒක හින්දා මේ දෙකම එකතු කරලා තනි එකක් හදන්න අමාරුයි. නමුත් අපිට මේක දිහා බලලා වැඩිම ආදායම් ලැබූ චිත්‍රපට ටික ගැන දළ අදහසක් ගන්න පුළුවන්.

නව සිනමාව

Higest Earning New Movies	Released Year	Net Gross Earning (Rs.)
3 Idiots	2009	1305673069
Ghajani	2008	1174822756
Dhoom 2	2006	788600000
Krrish	2006	814605346
Singh is King	2008	755881177
Rabne Banadi Jodi	2008	867800000
Welcome	2007	729827492
Om Shanti Om	2007	699601108
Lage Raho Munna Bhai	2006	652842977
Chak De India	2007	676900000
Gadar: Ek Prem Katha	2001	700000000
Ajab Prem Ki Gazab Kahani	2009	639624651
Hum Aap Ke Hai Kaun	1994	600000000
Taare Zameen Par	2007	624800000
Race	2008	594464799
Fanaa	2006	583433344
Jaane Tu Ya Jaane Na	2008	576298121
Dilwale Dulhaniya Le Jayange	1995	560000000
Love Aaj Kal	2009	663500000
Jodhaa Akbar	2008	549719298
Partner	2007	611900000
Kambakkht Ishq	2009	558743751
Wanted	2009	523840303
Partner	2007	611900000
Golmaal Returns	2008	516900000
Rang De Basanti	2006	521045312
Don – The Chase Begins	2006	511500000
Kuch Kuch Hota Hai	1998	500000000
Kaminey	2009	510321059
De Dana Dan	2009	482600000
Guru	2007	503458779
Dostana	2008	496854549
Bhool Bhulaiyaa	2007	497400000
Kabhi Kushi Kabhi Gham	2001	490000000
Koi Mil Gaya	2003	489268384

පරණ සිනමාව

Higest Earning Old Movies	Released Year	Net Gross Earning (Rs.)
Sholay	1975	2364500000
Mughal-E-Azam	1960	1326900000
Mother India	1957	1173000000
Sangam	1964	885700000
Aradhana	1969	1056152384
Kranti	1981	847700000
Bobby	1973	852500000
Do Raaste	1969	819428608
Ganga Jamuna	1961	843900000
Trishul	1978	776749952
Awara	1951	775135104
Muqaddar Ka Sikandar	1978	809000000
Coolie	1983	769535616
Roti Kapda Aur Makaan	1974	769800000
Don	1978	766791616
Naya Daur	1957	697500000
Amar Akbar Anthony	1977	946041664
Sachaa Jhutha	1970	754736896
Mere Mehboob	1963	692600000
Haathi Mere Saathi	1971	754736896
Dharam Veer	1977	690900000
Upkar	1967	690500000
Johny Mera Naam	1970	688900000
Jai Santoshi Maa	1975	678100000
Shree 420	1955	657600000
Kismat	1943	653600000

දත්ත වගු මූලාශ්‍ර : www.mumbai77.com / Ibosnetwork.com / Boxofficeindia.com

වැඩිදෙනෙකුගේ මතය අනුව දැනට වැඩිම ආදායම උපයා ඇත්තේ මේ ළගදී පැමිණි 3 Idiots චිත්‍රපටයයි. මෙහි ප්‍රධාන චරිතය රඟන්නේ ආමීර් ඛාන්. 3 idiots චිත්‍රපටය බිඳ දැමුවේ එතෙක් වැඩිම ආදායම ඉපයූ Sholay චිත්‍රපටයේ වාර්තාවයි. මම Sholay දන්නා පරිදි චිත්‍රපටයේ ප්‍රධාන චරිතය රඟන්නේ අමිතාබ් බච්චන්. අවුරුදු 35ක් තිස්සේ අංක 1 සිටි Sholay දැන් 2වන ස්ථානයට පැමිණ ඇත. ඉස්සරහට මොනවා වේවිද දන්නෑ. දන්නවනම් පහළින් ප්‍රතිචාරයක් දාන්න.

ලෝක සිනමාවේ ධන ආකර

2010-02-21T22:41:00.000+05:30

අද ලෝක සිනමාව නවීන තාක්ෂනයත් සමග දිනෙන් දින දියුණු වෙනවා. ප්‍රධාන වශයෙන් ලෝක සිනමාව පෝෂණය වන්නේ හොලිවුඩ් සිනමාවෙන්ය. ඒ වුණත් මේ වන විට බොලිවුඩය වැනි සිනමා කර්මාන්තත් ලෝක සිනමාව ආක්‍රමණය කරමින් පවතී. ඒ කෙසේ වෙතත් මම මේ කියන්න යන්නේ ලෝක සිනමාව තුල එතෙක් මෙතෙක් බිහි වූ වැඩිම ආදායම් ඉපයූ චිත්‍රපට ගැනයි. පහත වගුවේ දැක්වෙන්නේ එතෙක් මෙතෙක් වැඩිම ආදායම් ඉපුයූ සිනමා පට විස්ස පිළිවෙලින්ය. ආදායම ඇමරිකානු ඩොලර් වලිනි.

	නිකුත් වූ වර්ෂය	චිත්‍රපටයේ නම	සම්පූර්ණ ආදායම
1	2009	Avatar	$2,361,721,154
2	1997	Titanic	$1,842,879,955
3	2003	The Lord of the Rings: The Return of the King	$1,133,027,325
4	2006	Pirates of the Caribbean: Dead Man's Chest	$1,065,659,812
5	2008	The Dark Knight	$1,022,345,358
6	2001	Harry Potter and the Sorcerer's Stone	$976,457,891
7	2007	Pirates of the Caribbean: At World's End	$960,996,492
8	2007	Harry Potter and the Order of the Phoenix	$938,468,864
9	2009	Harry Potter and the Half-Blood Prince	$937,499,905
10	2002	The Lord of the Rings: The Two Towers	$926,284,377
11	1999	Star Wars Ep. I: The Phantom Menace	$924,288,297
12	1993	Jurassic Park	$923,067,947
13	2004	Shrek 2	$919,838,758
14	2005	Harry Potter and the Goblet of Fire	$896,013,036
15	2007	Spider-Man 3	$890,871,626
16	2009	Ice Age: Dawn of the Dinosaurs	$884,528,368
17	2002	Harry Potter and the Chamber of Secrets	$878,987,880
18	2001	The Lord of the Rings: The Fellowship of the Ring	$868,621,686
19	2003	Finding Nemo	$866,592,978
20	2005	Star Wars Ep. III: Revenge of the Sith	$848,998,877

දත්ත වගු මූලාශ්‍රය : www.the-numbers.com

විශේෂත්වය වනනේ මේ ළගදී නිකුත් කරන ලද "අවතාර්" චිත්‍රපටය සියළු චිත්‍රපට අභිබවා වැඩිම ආදායම ලැබීය. ඇත්තටම මේකේ නියම තරගය තිබ්බේ වසර 13ක් පුරා අංක 1 ස්ථානයේ බැබළුණු ජේම්ස් කැමරන්ගේ "ටයිටැනික්" චිත්‍රපටය 2010දී ඔහු විසින්ම බිද දැමීමයි. ඒ "අවතාර්" චිත්‍රපටය බිහි කරවමිනි. "අවතාර්" චිත්‍රපටය සෑදීමට වසර 10ක් ගත වුණා. එම වසර 10යේ දැරූ මහන්සියේ ප්‍රතිඵල එය නැරඹුවාම අපට බලාගන්න පුළුවන්. බැලුවේ නැත්නම් බලන්න. මිනිසාගේ කෑදරකමත්, පැන්ඩෝරා ලෝකයේ සුන්දරත්වයක් ඉතා මැනවින් පෙන්නලා තියෙනවා. ත්‍රිමාන සජීවිකරණය මගින් ප්‍රේක්ෂකයාට උපරිම ආශ්වාදයක් ලබා දීමට මෙම චිත්‍රපටයට හැකි වෙලා තියෙනවා.

කොහොම හරි ඉහත වගුව බැලුවම එක ලක්ෂණයක් පේනවා. එනම් චිත්‍රපට කතා මාලා වල පළමු චිත්‍රපටයේ සිට පිළිවෙලින් අවසන් චිත්‍රපට දක්වා ආදායම කෙමෙන් අඩු වී ඇති බවකි. උදාහරණයක් ලෙස "හැරී පෝටර්" වැනි චිත්‍රපට වල පළමු කොටස වැඩි ආදායමක් ලබා සිටියදී ඉන්පසුව පැමිණි චිත්‍රපට කොටස් වල ආදායම අඩු වී ඇති බවයි. මේකෙන් තව දෙයක් පෙන්වනවා ඒ තමා ලෝක සිනමා ප්‍රේක්ෂකයින්ගේ රස වින්දනය. ඒ වගේම ඔබේ රස වින්දනයට මේ චිත්‍රපට කෙතරම් දායක වුණාද කියලා පොඩි අදහසකුත් පළ කරලා යන්න.

ශ්‍රී ලංකා ද්වාරය

2010-02-16T09:36:00.000+05:30

ලංකා ද්වාරය(Lanka Gate) යනු ICTA(ශ්‍රී ලංකා තොරතුරු හා සන්නිවේදන තාක්‍ෂණ නියොජිතායතනය) විසින් මෙහෙය වන ව්‍යාපෘතියකි. එම ආයතනයට අනුව මෙය ඉ-ශ්‍රී ලංකාවක් බිහි කිරීමේ තවත් පියවරකි. මෙම බිහිදොර මගින් එකම ස්ථානයකදී සියළුම සේවාවන් ලබා දීමට නියමිතය. මෙමගින් සියළුම රාජ්‍ය සේවා සිංහල, දෙමල ,ඉංග්‍රීසි යන භාෂා ත්‍රිත්වයෙන්ම ලබා ගත හැක. තවම ඉදි වෙමින් පවතින මෙයට මේ වන විට පළමු රාජ්‍ය සේවාවද එක් කර හමාරය. එනම් අන්තර්ජාලයේ සිටම වාහන ආදායම් බලපත්‍රය අලුත් කරගැනීමේ සේවාවයි. මේ සදහා ප්‍රථමයෙන්ම www.srilanka.lk වෙබ් අඩවියේ සාමාජිකත්වය ලාබා ගත යුතුය. මම නම් තාම මෙම සේවාව ලබා ගෙන නෑ. එම නිසා මෙහි ක්‍රියාකාරීත්වය පිළිබඳ යම් අදහසක් ලබාගත නොහැකි විය. කෙසේ වෙතත් මෙය හොද පියවරක්. මේ නිසා කාර්යක්ෂම රාජ්‍ය සේවාවක් අපට බලාපොරොත්තු විය හැක. නමුත් තවම ලබා දී ඇත්තේ එක් සේවාවක් පමණි. එම නිසා මෙයින් උපරිම සේවාවක් ලබා ගැනීමට මෙම ව්‍යාපෘතිය සම්පූර්ණයෙන් අවසන් වන තෙක් අපට තව කාලයක් බලාගෙන ඉන්නට සිදු වේවි.
කෙසේ හෝ මෙම සේවා ලැබීමට දරන දිගු පෝලිම් නැති වේවා යයි අපි ප්‍රාර්ථනා කරමු.

ජනපති සටනෙන් බිහි වූ ගී සල රූ

2010-01-26T15:38:00.000+05:30

දැන් ශ්‍රී ලාංකීය ජනතාව හරි බරි ගැහිලා බලන් ඉන්නේ ජනපති සටනේ ජයග්‍රාහකයා කවුද? කියලා. ජනවාරි 23 මධ්‍යම රාත්‍රියේ ඉදලා ජනමාධ්‍ය ඔස්සේ ජනාධිපතිවරණ ප්‍රචාරණ කටයුතු නිල වශයෙන් නවතන ලදී. හැමෝම දන්නවනේ ප්‍රචාරණ කටයුතු සදහා රූපවාහිනිය කෙතරම් පාවිච්චි කළාද කියලා. ප්‍රධාන අපේක්ෂකයන් දෙදෙනා තම තමන්ගේ ජයග්‍රහණය සදහා විවිඩ වූ දැන්වීම් රූපවාහිනිය ඔස්සේ ප්‍රචාරය කළා. මේ දැන්වීම් අතරින් ලස්සනම දැන්වීම පිළිබඳ පොඩ් තරගයකුත් තිබුණා.

මම මේ කියන්න යන්නේ මගේ හිත ගිය දැන්වීම් 3ක් ගැන. විශේෂත්වය වන්නේ මෙම දැන්වීම් 3ම එකම අපේක්‍ෂකයාගේ දැන්වීමක් 3ක් වීමය. මේ සදහා එම ජනාධිපතිවරණ අපේක්‍ෂකයා විශාල මුදලක් වැය කර ඇති බවනම් නිසැකය. කෙසේ වෙතත් එම ප්‍රචාරණ කටයුතු සදහා යොදාගෙන තිබූ ගීතත් වීඩියෝ දර්ශනත් ඉතා නිර්මාණශීලී ඒවා. අවාසනාවට මම එම ගායකයන්ගේ හා පද රචකයන්ගේ නම් නම් දන් නෑ. දන්න කෙනෙක් ඉන්නවනම් කියන්න. නමුත් අලංකාර ගීත 3ක්. වීඩියෝ දර්ශනත් ඊට ගැළපෙන අයුරින් නිමවා තියෙනවා.

1.මිහිතලයේ සාමය අපටයි - පුංචි අපේ සෙනෙහස ඔබටයි (The peace on this land is for us Our innocent)

මම හිතන්නේ මේ තියෙන්නේ ලස්සනම දැන්වීම කියලා. තවත් විශේෂයක් තියෙනවා.එනම් මෙහි ඇති මුහුදු වෙරළ තීරයට යොදාගෙන තියෙන්නේ උස්වැටකෙයියාවේ මුහුදු වෙරළයි. දන්නවනේ ඉතින් මගේ ගම උස්වැටකෙයියාව කියලා.

2. ජය ජයවේ

මට පේන විදියට නම් මේ ගීතය ඔස්කා සම්මාන ලද 'ස්ලම් ඩෝග් මිලියනර්' චිත්‍රපටයේ ජෙය හෝ(Jai Ho) ගීතයේ ආභාෂය තිබේ.

3.දිනවමු ශ්‍රී ලංකා මාතා

මේකත් හොඳයි. අවස්ථාවට උචිත අයුරින් රූප රාමු සකසාගෙන ඇත.

සැලකිය යුතුයි: මෙය මැතිවරණ ප්‍රචාරණ කටයුත්තක් නොවේ. හුදෙක් මාගේ ගී රස වින්දනය හේතු කොටගෙන පමණක් ලියන ලද්දකි.

LockerZ - තෑගි ගන්න

2010-01-02T17:18:00.000+05:30

ලැබූවා වූ 2010 වසර ඔබ සැමට කිරියෙන් පැණියෙන් ඉතිරේවායි මම පළමු කොට පතමි. මේ මගේ 2010 වසරේ පළමු බ්ලොග් ලිපියයි. ඉතින් අලුත් අවුරුද්දට තෑගි ගන්න කවුරුත් කැමතියි නේ. ඔන්න ඉතින් LockerZ.com වෙබ් අඩවිය තියෙන්නේ ඒකට තමා. සමහරු මේ ගැන දැනටමත් දන්නවා ඇති. දන්නැති අයටත් එක්කයි මේ ආරංචිය කියන්නේ.

LockerZ මගින් අපට Points ලබා දෙනවා. ඒවායේ වටිනාකම අනුව අපට අවශ්‍ය තෑග්ගක් නිවසටම ගෙන්න ගන්න පුළුවන්. මුලින්ම හම්බවෙන්නනේ ටී-ෂර්ට් එකක්. හැබැයි පස්සේ පෙන් ඩ්‍රයිව්, දුරකථන, බෑග, සහ තවත් ගොඩක් දේ නිකන් දෙනවා. හැබැයි මාසෙකට එකයි ඉල්ලන්න පුළුවන්. ඒ ගැන විමසිල්ලෙන් නිතරම ලොග් වෙවි ඉන්නත් ඕනා. එතකොට පොයින්ට්ස් හම්බ වෙනවා.

තව දෙයක් ලොකර්ස් එකේ ‍නොමිලේ ලියාපදිංචි වෙන්න පුළුවන් වෙන්නේ දැනට ලියාපදිංචි වෙලා ඉන්න කෙනෙකු එවන ඉ-මේල් ආරඅධනාවක් මගින් පමණි. මේ විදියට 20දෙනෙකුට ආරධනා යවන්න ඕනා.

ඔබටත් LockerZ Invitation එකක් ඕනෑ නම් කමෙන්ටුවක් පහලින් දාන්න. ඉ-මේල් ලිපිනයක් ඒ සමඟ දාන්න.

සිංහල හෝඩිය ලොව ඇති නිර්මාණාත්මක හෝඩියක්

2009-12-12T18:56:00.000+05:30

‍පසුගිය දා ලොව ‍වඩාත් නිර්මෘණාත්මක හෝඩි තේරීමේ අන්තර්ජාතික සමුළුවක් පැවැත්වීණි.‍ මෙහිදී සිංහල හෝඩිය ලොව නිර්මාණාත්මක හෝඩි දහසයෙන් එකක් බව පිළිගැනිණ. මෙම පර්යේෂණය සිදු කරනු ලැබුවේ කොරියානු ජාතික මහාචාර්ය සුන් ජික් ඛේ විසිනි. ඔහු විවිධ රට වලට ගොස් මේ සඳහා අවශ්‍ය තොරතුරු විමසා බැලුවේ ය. සිංහල භාෂාව වෙනුවෙන් ජාත්‍යන්තර විනිශ්චය මණ්ඩලය ඉදිරියේ කරුණු දැක්වූයේ මහාචාර්ය ජේ.බී.

සිංහල හෝඩියට ආවේණික වූ අක්ෂර 6ක් තිබෙන මෙහිදී පැවසී ය. එනම් ඇ, ඈ, ඟ, ඬ, ඳ, ඹ යන අකුරුයි. සිංහල හෝඩිය සුළු වශයෙන් පාලි, සංස්කෘත හෝඩි වලින් ද ආභාෂය ලබා ඇත. එසේම මාලදිවයින් හෝඩිය සිංහල හෝඩියේ ආභාෂය ලබා ඇත.

සිංහල හෝඩිය හැර අනෙක් හෝඩි 15ට ‍ග්‍රීක, චීන, බුරුම, රෝම, දේවනගරි, ජපන් ආදී හෝඩීන් ද එකතු විය. මෙහි සුවිශේෂත්වය මෙම හෝඩි සියල්ලම ආසියානු කලාපයේ බිහි වූ ඒවා වීමයි.

නොමිලේ ඩොමේන් සහ ගූගල් රැළි ආරාධනා

2009-12-09T13:12:00.000+05:30

100% Free Domain

"100% Free Domain" කියලා නම් කියනවා. 100% ඇත්තද කියල නම් දන්නෑ. ලියාපදිංචි වෙලාම බලන්න.

________________________________________________________________________________

ගූගල් රැල්ල පාගන්න ආරාධනා

ගූගල් රැල්ලක් (Google Wave) ඕනේ නම් යටින් අදහසක් පළ කරන්න. හැබැයි නිකම්ම් නිකම් අදහස් දාන්න එපා. ගූගල් රැල්ල ගැන ඉතා අර්ථවත්, සිංහලෙන්, වැකි 2ක් පමණක් දාන්න. තෝරා ගත් පළමු 10+දෙනාට ගූගල් වේව් ආරාධනාවක් එවනවා. (Google Wave Invitation)

(මට ආරාධනාවක් එව්ව Naliyaවත් මේ අවස්ථාවේදී මතක් කරනවා)

පුවත්පතක සිටියෙමි!

2009-11-02T14:22:00.000+05:30

ඔන්න ටික කලකට පසුවයි මම බ්ලොග් ලිපියක් ලියන්නේ. ඒ මොකටවත් නෙමේ මට ලැබුණු විශේෂ අවස්ථාවක් ගැන කියන්නයි. මේකයි ඔක්තෝම්බර් 9 ලෝක තැපැල් දිනය වෙනුවෙන් කඳාන තැපැල් කාර්යාලය විසින් තැපැල් දෙපාර්තුමේන්තුවේ අනුග්‍රහය ඇතිව තැපැල් මුද්දර පිළිබඳව අන්තර් පාසල් දැනුම මිනුම තරගාවලියක් සංවිධානය කළා. මෙයට මගේ පාසල වන බප/මීග/ කඳාන සාන්ත සෙබස්තියන් මහා විද්‍යාලය නියෝජනය කරමින් මාත් සහභාගි වුණා. අවසානයේ අවසන් වටයට අප පාසල තේරුණා. අවසන් තරගයට අප සමග තරග වැදුණේ උස්වැටකෙයියාව සා.මරියා විද්‍යාලයයි. (මෙය මගේ ගමේ පිහිටි පාසලයි.) කෙසේ හෝ තරගාවලිය අප පාසල ජය ගත්තා. කුසලානයක් සමග තෑගි අප කණ්ඩායමට හිමි වූණා.

සතියකට පස්සේ පංතියේ කොල්ලෙක් කිව්වා ‘ඔයා පත්තරේ ඉන්නවා’ කියලා. ඒ පත්තර කෑල්ල පෙන්නුවම තමයි දන්නේ මම පත්තරේ ඉනනවා කියලා. (මටත් ඉතින් මාර හැපී) මගේ පිංතූරයක් පුවත්පතක පළවුනු පළමු අවස්ථාව මෙයයි.

පත්තර කෑල්ල නම් ගොඩක් පොඩි වෙලා. ස්කෑන් කරලා පොඩ්ඩක් සංස්කරණය කරලා තමා ගත්තේ.

ඉහතින් දැක්වෙන්නේ 2009 ඔක්තෝම්බර් 24 වැනිදා ලංකාදීප පුවත්පතේ පළවු ලිපියෙහි ඡායා පිටපතකි. (රවුම තුල ඉන්නේ me)

__________________________________________________________________________________

තැපැල් දිනය වෙනුවෙනුත් ඔබලා දැනුවත් කලොත් හොදයි කියලා හිතෙනවා. ඒ ගැන පොඩි විස්තරයක් තමයි මේ.....

ඉස්සර තැපැල් ක්‍රමයේදී ලිපි ලබන්නා තැපැල් ගාස්තු දැරිය යුතය. එහිදී පිටු ගණන, ලබන්නා වෙත ගමන්කල යුතු දුර යන සාධක මත ගාස්තු රඳා පවතී. නමුත් මේ ක්‍රමය අවාසි සහගත එකක් වූ නිසා ප්‍රතික්‍ෂේපයට ලක් විය. මේ සඳහා එංගලන්තයේදී ශ්‍රීමත් රෝලන්ඩ් හිල් "සම තැපැල් ගාස්තු ක්‍රමය" හඳ්‍රන්වා දුනි. මෙයට අනුව ලිපි යවන්නා අඳාළ ගාස්තු ගෙවිය යුතුය. එම ගාස්තු මුද්දර මඟින් අය කර ගැනීමට තීරණය විය. ඒ අනුව 1840 මැයි 6 වන දින වික්ටෝරියා රැජිනගේ ශීර්ෂය සහිත ලොව ප්‍රථම මුද්දරය නිකුත් විය. පැන්ස 1ක වටිනාකමින් යුතු එය "පෙනී බ්ලැක්" නම් විය.

‍එංගලන්තයේ මුද්දර දැති රහිත යි. ඒ වාගේම රටේ නම ද සටහන් කර නැත. ඒ සඳහා විශ්ව තැපැල් සංවිධානය ප්‍රථම මුද්දරය නිකුත් කිරීමේ ගෞරවය වෙනුවෙන් අවසර දී ඇත. විශ්ව තැපැල් සංවිධානය පිහිටුවා මේ ඔක්තෝම්බර් 9 දිනට අවුරුදු 135කි.

උස්වැටකෙයියා වෙරළට ගොඩබට තල්මසා

2009-09-30T22:36:00.000+05:30

මම අද (2009 සැප්තැම්බර් මස 07 වැනිදා සඳුදා) මෙම ලිපිය ලියන්නේ පුංචි පුවතක් ගැනය. අද උදේ උස්වැටකෙයියාවේ මුහුදු වෙරළට මිය ගිය තල්මසෙක් ගොඩ වැදිණි. මගේ නිවස පිටුපස මුහුදු වෙරළෙහි මෙම තල්මසා ගොඩගසා තිබුණි. එම නිසා මා හට හොඳින් දැක බලා ගැනීමට අවස්ථාව ලැබුණි. මෙය මම තල්මසෙකු සියැසින් දැකබලා ගත් ප්‍රථම අවස්ථාවයි. ගමේ මිනිස්සු මෙම අවස්ථාව දැක බලා ගැනීමට රොක් විය.
නමුත් තල්මසාගේ හිස පෙදෙස නොතිබුණි. මුහුදේ රළු ගතිය නිසා එය වෙන්ව ගොස්යන්නට ඇත. දවස් කිහිපයකට පෙර මිය ගිය තල්මසෙක් බව අවට පැතීරි ගිය දුර්ගන්ධයෙන් පැහැදිලි විය. නිවස ආසන්නයේ තිබූ හෙයින් ගන්ධය විටෙක ඉවසා ගත නොහැකි විය. මාධ්‍යවේදීන් පවා මෙය වාර්තා කිරීමට පැමිණියහ.
පහතින් දැක්වෙන්නේ මා විසින් ගන්නා ලද ඡායාරූප දෙකකි. (ප.ව. 2.30 ට පමණ) මේ සඳහා LG KG200 ජංගම දුරකථනයක් භාවිතා කරන ලදී.

ජංගම දුරකථනයේ කැමරාව මෙගා පික්සල් 1.3ක් වූ නිසාත් ඈත සිට ගත් නිසාත් ඉතා පැහැදිලි ඡායාරූප ගත ‍නොහැකි විය.

“භාෂිත” නමින් අලුත් ‍ෆොන්ට පැකේජයක්

2009-09-06T18:16:00.000+05:30

ශ්‍රී ලංකා තොරතුරු හා සන්නිවේදන තාක්‍ෂණ නියෝජිතායනය(ICTA) සිංහල යුනිකේත භාවිතය ප්‍රවර්ධනය කිරීමේ අරමුණින් නව ෆොන්ට පැකේජයක් හඳුන්වා දී ඇත. එය “භාෂිත” දැනට භාවිතයේ ඇති සිංහල යුනිකේත ෆොන්ට ප්‍රමාණය ඉතා සීමිත යි. එම ෆොන්ට වල අකුරු රටාව පවා ඒකාකාරී බවක් ඇත. එබැවින් බොහෝ දෙනෙකු නව නිර්මාණශීලි රචනා කටයුතු සඳහා මෙම ‍ ෆොන්ට භාවිතා කිරීමට ඇතැම් විට මෑළි වෙති. ඒ නිසා “භාෂිත” ෆොන්ට පෙල හඳුන්වා දී ඇත. මෙය සියබස් වෙබ් අඩවිය(www.siyabas.lk) ඔස්සේ නොමිලේ ලබා දේ. නමුත් ඔබේ පහසුව තකා මෙතැනින් බාගන්න.

“භාෂිත” බාගන්න (bhashitha.zip - 1MB)

“භාෂිත” ෆොන්ට පැකේජයෙහි වින්ඩොස් හා ලිනක්ස් මෙහෙයුම් පද්ධති වලට සරිලන ෆොන්ට කිහිපයක් (සියළුම ෆොන්ට ගණන 10කි) අඩංගු වේ. ඒ අතර Bhashitha-Sans, Bhashitha-Serif, DinaminaUniWeb හා Sarasavi Unicode යන ෆොන්ට(True-Type Fonts) ප්‍රධාන වේ. මීට අමතරව මෙම ෆොන්ට ම ලිනක්ස් සඳහා ගැලපෙන අයුරින්ද නිමවා ඇත. කෙසේ නමුත් මෙය සාමාන්‍ය එදිනෙදා භාවිතයට සුදුසු ෆොන්ට අඩංගු වේ.

නමුත් මට හැ‍‍ඟෙන පරිදි මෙම ෆොන්ට පවා භාවිතයට ප්‍රමාණවත් මදිය. ඒ එහි අනෙක් සිංහල යුනිකේත ෆොන්ට වාගේම ඒකාකාරී බවක් ගනී. නමුත් ආරම්භයක් වශයෙන් මෙම “භාෂිත” ෆොන්ට පෙලද වටී. එහෙත් විවිධාකාර විචිත්‍ර සිංහල යුනිකේත ෆොන්ට අප සතුව නැත. අතලොස්සක් එවැනි ෆොන්ට තිබුණද මිල අධිකය. කෙසේ හෝ වචිත්‍රවත් ෆොන්ට අපට සාදා දේ නම් ගොඩක් වටී. එසේම සිංහල යුනිකේත අනුගත අක්ෂර රටා සාදන සැටි කියා දේනම් නවකයන්ට අත්වැලක් වනු ඇත.

කලාත්මක පර්වතයක් වූ ආලකමන්දාව කෝ?

2009-09-01T13:35:00.000+05:30

අද අප හදුන්වන සීගිරිය ලොව සුපතල කලාගාරයකි. ඇතැමෙක් එය බලකොටුවක් ලෙසද හදුන්වයි. අප දන්නා තරමින් මෙය පස්වන සියවසේදී කාශ්‍යප රජතුමා විසින් නිර්මානය වූවෙකි. ඇත්ත වශයෙන් ම සීගිරිය රාවනා රජ සමයට ත් පෙර එනම් අවුරැදු 3800 කටත් පෙර නිර්මාණය වූවෙකි. එකල සීගිරිය හැදින්වූයේ ආලකමන්දාව යනුවෙනි.
අතීත කතා අනුව එකල විසූ විශ්‍රව රජුගේ පුත්‍රයෙකු වූ හෙවත් රාවණා රජුගේ වැඩිමල් සොහොයුරෙකු වූ වෛශ්‍රවණ ආලකමන්දාවේ වාසය කර ඇත. වෛශ්‍රවණ රාවණාත් සමඟ ආරාවුල් ඇති කරගත් හෙයින් වෛශ්‍රවණ ආලකමන්දාව අත හැර ගියේය. පසුව එය කුම්භකර්ණ කුමරැගේ වාසස්ථානය විය. කෙසේ වෙතත් අවසානයේ දී ආලකමන්දාව විවිධ යුධ ගැටුම් හේතුවෙන් අභාවයට යන්නට ඇත.
සීගිරිය හෙවත් ආලකමන්දාව විජයාගමනයටත් පෙර අතිතයේ විසූ ජනයාගේ ශිල්පිය දක්‍ෂතා මැනවින් පෙන්වා දෙයි. එහි ලොව සුපතළ බිතු සිතුවම් අතීත සිත්තරැන්ගේ නිර්මාණයක් වන අතර පසුව චිත්‍ර ශිල්පය පසු බෑමකට ලක්ව ඇත. අතීත කතා අනුව ආලකමන්දාවේ පර්වත මුදුනේ මාළිගයට යාමට සෝපානයක් (කර්කටක යන්ත්‍රය) තිබී ඇත. මෙහි දෝලාව වැනි කොටසට මිනිසුන් නැඟී සිටි විට සේවකයන් අතින් ක්‍රියා කර වූ පසු සෝපානය ඉහලට එස වේ.
කෙසේ වුවත් මෙම අභාවයට ගිය ආලකමන්දාව කාශ්‍යප රජතුමා විසින් සීගිරිය නමින් ප්‍රතිසංස්කරණය කරනු ලබයි. පසුව මෙහි චිත්‍ර හා නව අංග එකතු කරමින් වැඩි දියුණු කර ගත් පසු කාශ්‍යප රජතුමා ආරක්‍ෂක ස්ථානයක් ලෙසද, කලාගාරයක් ලෙසද භාවිතා කරන්නට ඇත.

ප.ලි:මෙ‍ම ලිපිය මීට පෙර මා විසින් වෙනත් බ්ලොග් අඩවියක ප්‍රකාශයට පත් කොට තිබුණි.

ආයුබෝවන්!

2009-09-01T13:24:00.000+05:30

අද මම හරි හමන් විදිහට බ්ලොග් අඩවියක් පටන් ගත්තා. ඔන්න ඉතින් මමත් සයිබර් අවකාශයේ දින පොතක් ඇරඹුවා.හැබැයි මේක මගේ දෙවන ලිපියයි. මොකද මම කලිනුත් එකක් ලියලා තිබ්බා.(බලන්න) කොහොම හරි ඉතින් මගේ Talks බ්ලොග් අඩවියට ආයුබෝවන් කියලා පිළිගන්නවා.
ඉදිරියේදී අර්ථවත් ලිපි පෙළක් ඔබ හමුවේ තැබීමට බලාපොරොත්තු වෙනවා. ඒ සඳහා ඔබගේ වටිනා අදහස් ඉතා වැදගත්ය.